Shillong, Jylliew 09
Ki kynhun sengbhalang hapoh ka Mawsynram Block, ki la rai ban pynlong ka jingïakhih leit tur sha Secretariat ha ka sngi Thohdieng, kata ka 12 tarik mynta u bnai, ban pynpaw ïa ka jingpyrshah halor ka jingbym ai jubab ka Sorkar halor ka jingdawa jong ki, ban pynsangeh noh ban aiti pynïaid sam bording sha ka SAI Computer Limited.
Ki nongïalam sengbhalang, ki la pynpaw ba watla ki la pyrshah ïa kane bad ki la ïoh ruh ban ïakynduh ïa u Myntri Tnad Bording, u Bah Metbah Lyngdoh hynrei haduh mynta ki khlem ïoh jubab eiei.
Ki la buh jingkylli ruh “La ka Sorkar ka pdiang ne-em ïa ka jingdawa jong ki sengbhalang bad ki nongpyndonkam bording ka Mawsynram Sub Division”.
Ha ka 12 tarik ki sengbhalang, ki paidbah hapoh ka Mawsynram Sub Division ba kynthup ka Mawphlang Block, Mawsynram Block bad Ranikor Block, kin leit tur sha Secretariat halor ka nongrim ba ka Sorkar ka khlem ai ïa ka jubab.
“Namar ba ka Sorkar kam ai ïa ka jubab halor ka jingdawa ki sengbhalang bad ki paidbah nongshong shnong, ngim banse ban rai rangbah ban leit tur sha Secretariat. Bad kane kadei ka jingpynbna sha baroh ki nongshong shnong ka thaiñ, ba kin ïa long shitylli ban ïa mih paidbah ban dawa ïa ka hok,” la ong ki nongïalam sengbhalang.
Ki la ong ruh ba ka jingrai ban leit tur sha Secretariat, kadei ban pynpaw ïa ka jingpyrshah ïa ka SAI kompeni, kaba ka Sorkar ka la aiti sha kane ka kompeni ban sam bording ha ka thaiñ Mawsynram Sub Division.
Namarkata, ki nongïalam sengbhalang na Mawsynram, ki la khot la wer ïa baroh ki nongshong shnong, kiba sah ha Sor bad khapsor, ba kin ïa mih ryntih ha katei ka sngi, ban ïatylli “Ngi kyrmen ba ka jingïakhih bad jingdawa kan urlong.”
