Shillong, Jylliew 09
U Myntri ka tnad pule-puthi ka Jylla, u Bah Lahkmen Rymbui ha ka Sngi Ba-ar u la ong ba ka Jylla kan sa sakhi ïa ka jingmanbha kaba “jur” ha ka kyrdan jong ka Performance Grading Index (PGI) na ka bynta u snem 2026-27.
U Myntri u la pynshong nongrim ïa kane ha ki jingkylla kiba la ïaid mynta, ha kine ki 8 snem ba la dep.
U Bah Rymbui u la ong ba ka jingpynleit jingmut jong ka Sorkar ka long ban pynkhlaiñ hi ïa ka tnad pule-puthi, ym tang ban beh ïa ki jingkheiñ PGI kiba kham bha.
“Peit, nga sngew ba kane ka mat ka long kaba biang bha ban ïakren, ym tang ban ïakren. Shuh shuh, kaba ngi hap ban peit ka long la hato ka Sorkar ka la leh eiei ne em. Kata ka dei ka bynta kaba kongsan. Mynta, hato ka Sorkar ka la pynbeit ïa kane ka kam? Ka jubab ka long hooid, hooid, namar na ka por sha ka por, na uwei u snem sha uwei pat, ka don beit ka jingmanbha ha ka jingkiew jong ki jingkheiñ (score),” u la ong.
U Myntri u la jer ïa ka jingmanbha jong ka pule-puthi, ka bha ka miat jong ki khynnah pule bad ki nonghikai, bad ka jinglah ban ïoh bynta, kum ki jaka ha kaba la leh ïa ki kam kiba khraw.
“Nga ngeit skhem ba ha ka PGI ban wan jong u snem 2026-2027, ka kyrdan jong ngi kan sa kiew bha, namar kaei kaba ngi la leh ha kine ki 8 snem ba la dep ka long ka bym pat ju leh mynno-mynno. Ym tang ban shimkhia ïa ka PGI, hynrei ban leh eiei ha ka ban ïoh ïa ka pule-puthi kaba bha, ban leh eiei halor ka bha ka miat jong ki khynnah pule, ban leh eiei ïa ka bha ka miat jong ki nonghikai, bad kumta ter-ter,” la ong u Bah Rymbui.
U la khot la wer ruh na ka bynta ka jingpyrshang kaba ïaineh na baroh ha ka tnad bad ong ba ka jingbuh hakhmat eh ka dei ban long ïa ka jingpule jong ki khynnah.
“Kumta, ngi hap ban trei shitom. Bad trei ym tang mynta ka sngi, hynrei ngi hap ban trei shitom man la ka sngi. Ngi ha ka tnad pule-puthi ngi trei shitom, la ki long ki ophisar, ki nonghikai, ne ki nongpynïaid, ngi hap ban trei shitom. Namar wat peit ïa ka PGI kum ka jingkheiñ ne kyrdan, hynrei peit ïa ki skul bad kumno ban nang pynbha ïa ka pule-puthi, namar ka mat ba kongsan jong ngi ka long ban ai ïa ka jingpule kaba paka sha ki khynnah jong ngi,” la bynrap u Bah Rymbui.
