Khliehriat, Jylliew
Ka Jaiñtia Students’ Union (JSU) bad Jaiñtia National Council (JNC) ha ka 8 tarik Jylliew kila leit ai jingkyrshan bad ai mynsiem ïa u samla Marshall SB Biam, President ka Jaiñtia Coal Owners, Miners, Suppliers & Workers Association (JCOMSWA) uba dang shong shah thngan khlem buh por halor ka jingdawa ban plie noh ïa ka jingtih dewïong hapoh East Jaiñtia.
Ha ka kyrwoh, ki ar seng kila kyntu ïa ka Sorkar ba kan khot ïakren noh ïa une u samla rangbah, namar ba ka Sorkar ka la ju ïalam bakla na ka por sha ka por ïa ki paidbah haba ïadei bad u dewïong.
Na ka liang ka JSU ka pynkynmaw ba ha u snem 2019, u Myntri Rangbah ka Jylla u la kular ba lada u wan ha ka bor un pyllait noh ïa ka kam tih dewïong hapoh Jaiñtia Hills district.
Kala pynkynmaw ruh ba ha u snem 2014 por ba khang ïa u dewïong hapoh Jaiñtia Hills ka Sorkar MUA-II, kala don ka jingïakhih ba jur kaba la shim ruh ïa ar ngut ki mynsiem briew.
