Shillong, Jylliew 09
Ki kam tuh kam thiem ki dang jur bad ïai bteng na kawei ka sngi sha kawei pat bad ïa kane lah ban sakhi na ki jingjia jong ki kam tuh ha kylleng ki bynta ka nongbah Shillong bad kumjuh ruh sha kiwei ki bynta jong ka Jylla.
Katkum ka khubor kaba la ïoh na ki pulit la ong ba u Shagun Agarwal u la ai ka jingujor ba ha ka 3 tarik mynta u bnai ha ka por kumba 7 baje janmiet, ki runar bym lah ban ithuh, ki la tuh ïa ka mobile phone ka jong u na Police Bazar, Shillong.
Ha kawei pat ka khubor, u Sunil Pandurang Khothare u la ai ka jingujor ba ha ka 1 tarik mynta u bnai, ki runar bym lah ban ithuh, ki la tuh ïa ka pisa kaba long T.73,000/- na ka pla ka jong u ha Police Bazar, Shillong.
Katba na ka liang ka Kong Krelinda Khyriemmujat ka la ai ka jingujor ba ha ka 6 tarik mynta u bnai ha ka por kumba 10 baje mynmiet, ki runar bym lah ban ithuh, ki la tuh ïa ka arshaka ka jong ka, kaba don ïa u registration number ML05-R-7426 na ka thaiñ Police Bazar, Shillong.
Na ka liang jong u Bah Lamki Shaphrang Hujon u la ai ka jingujor ba ha ka 7 tarik mynta u bnai, ki runar bym lah ban ithuh, ki la prong tuh hapoh ka jaka ka jong u, kaba don ha GAD Quarter, Barik, Shillong bad ban tuh ïa kawei ka TV, ka Jaiñsem bad ka pisa T.10,000/-.
Ha kawei pat ka khubor na ki pulit la ong ba ha ka 8 tarik mynta u bnai ha ka por kumba 3 baje mynstep, ki runar bym lah ban ithuh, ki la tuh ïa kawei ka arshaka kaba don ïa u registration number ML05-AD-6025 na ka thaiñ Ummir Mawpdang, Shillong.
La ong ba ha ka 7 tarik mynta u bnai ha ka por kumba 3 baje dang step, ki pulit ki la ïoh pdiang ki jingpyntip ba ki runar bym lah ban ithuh, ki la tuh ïa ki tape kali (music systems) kynthup ïa ki LCD tape, ar tylli ki amplifier bad ar tylli ki speaker na ki lai tylli ki kali, kiba don ïa u registration number ML04-C-8475, ML05-Y-6042 bad ML05-R-2047 ba la pynïeng ha Riatsamthiah Block-I, Parking lot, Shillong.
Ha kawei pat ka khubor, u CS Kazipyo u la ai ka jingujor ba ha ka 6 tarik mynta u bnai, ki runar bym lah ban ithuh ki la tuh ïa ka arshaka ka jong u, kaba don ïa u registration number MZ01-AB-2543 na ka jaka sah ka jong u, kaba don ha Dum Dum Nongthymmai, Shillong.
Na ka liang jong u Arnab Hajong u la ai ka jingujor ba ha ka 7 tarik mynta u bnai, ha ka por kumba 1 baje mynstep, ki runar bym lah ban ithuh, ki la prong tuh hapoh ka dukan ka jong u, kaba don ha Garobadha ha South West Garo Hills bad ban tuh ïa ka pisa kaba long T.2.5 lak.
U Surojit Roy u la ujor da ka ktien ba ha ka miet jong ka 5 bad 6 tarik mynta u bnai, ki runar bym lah ban ithuh, ki la pynjulor ïa ka arshaka ka jong u (ML08-L-7037) ha Hawakhana, Tura (WGH) hadien ba la suba ba ki la thmu ban tuh ïa ka.
U Sengbath M Momin u la ujor ba ha ka step jong ka 7 tarik mynta u bnai, u la lap ba ka arshaka ka jong u (ML08-H-4311) ka la jah najan jong ka Circuit House, Tura (WGH).
