Shillong, Jylliew 09
Ka Khasi Students’ Union (KSU) lyngba ka Education Cell ka la phah da ka jingthoh sha u Myntri Rangbah ka Jylla ha ka 01 tarik u Jylliew 2026, ban pynpaw ïa ka jingsngewkhia kaba jur halor ka jingbym pat pyllait jong ka Sorkar Jylla ïa ka Chief Minister’s Scholarship (CM Scholarship) sha ki samla pule, kiba dei hok ban ïoh ïa kane ka jingïarap.
Ka KSU ha ka kyrwoh ba la phah ka la ong ba ka seng ka la pynkynmaw, ba la palat shi snem mynta naduh ba bun ki samla pule ki la dep ban aplai bad pyndep ïa baroh ki jingdonkam katkum ki kyndon ba la buh, hynrei haduh mynta kim pat ïoh satia ïa ka scholarship kaba dei ka hok jong ki.
“Kane ka jingslem, ka la wanrah ka jingeh kaba khraw ïa bun bah ki samla pule kiba shaniah ha ka CM Scholarship, ban kyrshan ïa ka jingpule jong ki,” ka la ong.
Halor kane ka bynta, ka KSU ka la kyntu ïa u Myntri Rangbah ba un tuklar hi dalade ban peit bniah ïa kane ka kam bad ban pynthikna ba ka CM Scholarship, kan poi noh sha ki samla pule kiba dei hok ban ïoh ïa ka.
Ka KSU ka ngeit, ba kum u khliehduh jong ka Sorkar Jylla, u Myntri Rangbah un shimkhia halor kane ka bynta namar ka lawei jong ki samla pule ka shong ha ka jingïoh jong ki, ïa ki lad jingkyrshan kiba biang ha ka por kaba dei.
Ha kajuh ka por, ka KSU ka la buh hakhmat eh sha u Myntri Rangbah ïa kine ki mat jingdawa, ba kynthup ban pyllait noh mar-mar ïa ka CM Scholarship sha baroh ki samla pule, kiba la dei ban ïoh bad kiba dang ap sah haduh mynta.
Ki jingdawa ki kynthup ruh ban pynbna paidbah ïa ka por kaba shai halor ka jingpyllait ïa kane ka CM Scholarship, khnang ba ki samla pule kin ïoh jingtip kaba thikna. Ban buh da ka Helpline ne Complaint Mechanism, na ka bynta ki samla pule kiba dang shem jingeh ne kiba don jingtip ba ki donkam halor ka CM Scholarship bad ban pynthikna ba ha ki snem ban wan, yn ym don shuh ka jingslem kaba kum kane ha ka jingpyllait ïa ka CM Scholarship.
Kumta ka Khasi Students’ Union, ka kyntu jur ïa u Myntri Rangbah ka Jylla, ban shimkhia mardor halor kane ka kam, khnang ba ki samla pule jong ka Jylla kin ym shah ktah ïa ka lawei jong ki, na kadaw ka jingbym ïoh biang por ïa ka CM Scholarship, kaba dei ka hok bad ka jingkyrshan kaba kongsan ïa ki.
