Shillong, Jylliew 09
Ka jingïalang ka Executive Committee jong ka Khasi Hills Autonomous District Council (KHADC) kaba la long ha ka 08 tarik u Jylliew, 2026, ka la shim ïa ka rai ban kyntiew tulop noh ïa ki Casual Worker ka Council.
Haba kren sha ki lad pathai khubor, u Bah Winston Tony Lyngdoh, Chief Executive Member (CEM) ka KHADC u la ong, ba ka jingkyntiew tulop kan long ïa 72 ngut ki Casual Worker, kiba ïoh jingsiew baroh shi katta hapdeng ka 5000 bad 7000 tyngka shi bnai.
U la ong ba yn kyntiew sha ka 10 hajar tyngka marwei bad ka Council hapdeng ka jingkyrduh pisa, kan ïaleh ban sdang katkum ka Minimum Wage Act ka Sorkar Jylla.
“Hooid ka Council ka don mynta ha ka jingkyrduh pisa, hynrei watla hapdeng kine ki jingeh, ka EC ka la sngewdei ban nym pynduh ïa ka bhah jong ki nongtrei casual. Kumta ngi la ïarai da ka EC hi baroh kawei, ba ngin pynkiew noh ïa ka tulop jong ki sha ka 10 hajar tyngka shibnai,” la ong u Bah Winston Tony.
U la ai khublei ïa ki EM baroh kiba la ïarai lang, namar kane kadei kawei ka sienjam kaba kongsan eh, da kaba bynrap “Hooid ngi sngewthuh ïa ka jingeh haba ïadei bad ka pla tyngka, hynrei ngi la buh ïa ki casual hakhmat eh ban. Ka EC ka la rai ban pynkiew noh ïa ka tulop ki nongtrei casual baroh”.
“Ka jingsiew kan long na ka 5000 sha ka 10 hajar tyngka. Hooid kan don ka jingktah ïa ka pla tyngka ka Council, hynrei ngi la aiti sha u EM ba khmih ïa ka pla tyngka ban peitbniah bad ban wanrah ïa ka kaiphod ha ka jingïalang, ban tip katno ka ban khia ïa ka Council haba pynkiew ïa ka tulop ki nongtrei casual,” la bynrap u Bah Winston Tony.
