Shillong, Jylliew 09
Ka Sorkar Meghalaya ka la mynjur ban pyndam noh ïa ka kontrak jong ka SAI Computer Ltd na ka bynta ki kam sam bording ha Mawsynram, Ranikor bad Mawphlang, hadien ka jingjur jong ka jingpynbor na ki nongïalam ka NPP bad ki jingujor na ki paidbah, la ong ki nongmihkhmat ka seng ha ka sngi Ba-ar.
Ka kynhun jong ki nongïalam ka NPP na ki lai tylli ki konstitwensi hapoh ka jingïalam jong u MLA barim ka Mawsynram u Bah HM Shangpliang, ki la ïakynduh ïa u Myntri Rangbah ka Jylla u Conrad K Sangma haduh arsien ha une u bnai ban dawa ban phah mih noh mardor ïa kane ka kompeni.
Lah ban kdew ba hadien ba la shimti da kane ka kompeni SAI ban sam bording sha kitei ki thaiñ, ka la mih ka jingud jingnam na ki paidbah nongshong shnong, ba ka la kiew shaba palat ka pisa bai thang bording ilektrik.
U Bah Shangpliang u la ong ba ka jingïalang kaba nyngkong ka la long ha ka 5 tarik mynta u bnai, ha kaba u Myntri Rangbah u la kular ban peit bniah ïa kane ka kam. Bad dei ha ka jingïalang kaba ar ha ka miet sngi Nyngkong, ba ka Sorkar ka la kular ban leh ïa kaba donkam.
Haba kren sha ki lad pathai khubor u Bah HM Shangpliang u la pyntip ba hadien ka jingïai buddien ki nongïalam ka NPP na 3 tylli ki Konstitwensi, ban dawa na ka Sorkar Jylla, ban wengnoh ïa katei ka kompeni, na ka liang u Mynri Rangbah u la kular ban peitbniah shuwa ïa kane ka kam, da kaba pynthikna ba un sa wengnoh ïa kane ka kompeni.
U Bah HM Shangpliang u la ong, ba ha ka jingïakynduh bad u Myntri Rangbah, u la mynjur ban wengnoh ïa ka jingïateh ïa ka SAI Computer limited, ban sam bording ha ki thaiñ Mawsynram.
“Ngi kyrmen ba ha kine ki khyndiat sngi, kane ka kompeni SAI, kan mih noh ban sam bording ha ka thaiñ,” u la ong.
“Ngi kwah ban pyntip sha baroh ki nongshong shnong ka thaiñ, ba hadien ka jingbuddien ki nongïalam ka NPP na lai tylli ki Konstitwensi, u Myntri Rangbah ka Jylla u la mynjur ban wengnoh ïa ka SAI na ka thaiñ ban sam bording,” la bynrap u Bah HM Shangpliang.
Haba bynrap na ka liang u Bah Alvin K Sawkmie, MDC ka Mawsynram u la pynpaw ka jingsngewkmen ba u Myntri Rangbah ka Jylla u la pynthikna ban wengnoh ïa ka Kompeni SAI Computer limited ban sam bording ha ka thaiñ.
U Bah Alvin u la ïathuh ba u Conrad u la pynthikna ban wengnoh ïa ka SAI, kaba sam bording ha Ranikor, Mawphlang bad Mawsynram, kumta ki paidbah kin sngewbha ban ïaishah, ba ha kine ki khyndiat sngi, la thikna ba ka Sorkar kan sa wengnoh ïa ka kompeni SAI, ban sam bording ha ki thaiñ Mawsynram.
