Shillong, Jylliew 09
U Myntri Sorkar uba dei ruh u nongmihkhmat ka Amlarem, u Bah Lahkmen Rymbui ha ka Sngi Ba-ar u la kubur ba ki kam jngohkai pyrthei bad ki lad kamai jong ki nongshong shnong ha Dawki bad ki jaka ba marjan ki la shah ktah na ka projek surok Shillong-Dawki kaba dang ïaid shakhmat, hynrei u la kyntu ban long kiba ïaishah katba ka jingpyntrei ka dang ïaid.
Haba kren sha ki nongthoh khubor, u Bah Rymbui u la ong ba ka Jylla bad ka Sorkar Pdeng ki ithuh ïa ka jingdonkam jong ki kam jngohkai pyrthei, hynrei kumba ka long, ki jingtei ki wan nyngkong eh.
“La kyrkhu ïa ka Meghalaya da ka jingitynnad mariang kaba ngi ïoh, hynrei haba ong kumta, ka Sorkar Meghalaya bad ka Sorkar India ki ithuh ïa ka jingdonkam jong ki kam jngohkai pyrthei. Hynrei ngim lah ban kyntiew ïa ki kam jngohkai pyrthei khlem ka surok, ki lad pynïasoh ‘telecommunication’ bad kiwei-kiwei ki jingdonkam ba kongsan,” u la ong.
Na ka liang u Myntri, u la pynpaw ka jingsngewnguh ïa ka Sorkar Pdeng kaba la bei tyngka ïa ka surok Shillong-Tamabil, ha kaba ka jingpyntrei ka dang ïaid shakhmat. U la kubur ruh ba kane ka jingpyntrei ka la ktah ïa ka jingwan jong ki nongjngohkai pyrthei bad ka ïoh ka kot jong ki nongshong shnong.
“Kumta, ngi sngewnguh shibun eh ïa ka Sorkar India kaba la bei tyngka ïa ka surok Shillong-Tamabil, kaba ka jingpyntrei ka dang ïaid shakhmat. Bad hooid, kumba long mynta, ka jingwan ki nongjngohkai pyrthei sha katei ka thaiñ ka shah ktah, ka kamai-kajih jong ki paidbah ka shah ktah, hynrei kaei-kaei ka long ba ngi donkam ban ïaishah,” ong u Bah Rymbui.
“Ka jingïaishah ka long ba mynta nga la ïohi ba ka kam ka ïaid bha shakhmat, bad nga kyrmen ba ha ka por kaba lyngkot eh, ki liang ba pyntreikam ne u kontraktor kin sa lah ban pyndep ïa ka kam,” u la bynrap.
Ha kajuh ka por, u Bah Rymbui u la pynpaw ïa ki jingsngewkhia ha ka liang ka jingshngaiñ namar ka jingbym skhem ka khyndew ha ka thaiñ, da kaba kdew ba wat u slap uba rit eh ruh u wanrah ïa ka jingtwa khyndew bad ba ki mynsiem briew ki la duh ha ka por ba dang ïaid ka jingpyntrei ïa ka surok. U la ban jur halor ka jingdonkam ban don ïa ki lad jingïada.
“Hynrei kumba ka long mynta, ka ktah ïa ka thaiñ Dawki, Mawlynnong bad kito ki jaka, ka ktah ïa ka kamai-kajih jong ki paidbah. Hynrei kumba nga la ong, namar ka jingpyntrei kaba dang ïaid shakhmat, bad kumba phi tip ba ka khyndew ha katei ka jaka kam long kaba skhem, bad man ka por lada don wat tang khyndiat eh ruh ka jinghap slap, ki jingtwa khyndew ki ju don beit. Kumta, ka long kaba donkam ban shim ïa ki lad jingïada namar ngim lah ban kyntait ïa ka jingshisha ba ka jingim briew ruh ka la duh noh ha ka por ba ka jingpyntrei ka dang ïaid shakhmat,” u la ong.
Shuh shuh u Myntri u la bynrap ba ka dei ka kamram jong u Sub-Divisional Magistrate bad ka Sorkar ban pyntikna ïa ka jingshngaiñ bad ban pynsted ha ka ban pyndep ïa ka kam.
“Kumta, ka dei ka kamram jong u Sub-Divisional Magistrate ban peit ba dei ban shim ïa baroh ki lad jingïada, bad ka dei ruh ka kamram jong ka Sorkar ban peit ba ïa ka jingpyntrei dei ban pyndep kloi katba lah,” la ong u Bah Rymbui.
