Shillong, Jylliew 09
U President ka Jaiñtia Coal Owners, Miners, Suppliers and Workers Association (JCOMSWA), Bah Marshal Biam u la sdang ban tlot ka met hadien khyndai sngi ba u la shong shah thngan ban pynbor ïa ka Sorkar Jylla ban plie noh ïa u dewïong ha Jaiñtia Hills.
Haba ïakren bad u Secretary ka JCOMSWA u Bah Khrawbor Ryngkhlem u la ïathuh ka jingshong shah thngan u Bah Marshal Biam ka la sdang naduh ka 1 tarik Jylliew haduh mynta ka khyndai tarik ha Ladrymbai Dongwah bad u la sdang ban tlot namar u khlem bam eiei.
“Lada u President u shitom un poi sha hospital ngin bteng sa ma ngi ki dkhot haduh ba ka Sorkar kan pynurlong ïa ka jingdawa jong ngi,” u la ong.
U la ïathuh ba haduh mynta ki briew jong ka Sorkar lada dei na u MLA ka thaiñ Bah Kyrmen Shylla, u MDC ka thaiñ bad ki ophisar ym pat don ba wan mih sha kane ka jaka ba shah thngan.
“Ka jingdawa jong ngi ka long ban plie ïa u dewïong haba kiba rit ba ria ki lah ban im lang ym dei ban plie tang ïa ki ‘high level’ kiba dei ki briew jong ka Sorkar Jylla,” u la ong.
U la pyntip ba ka jingkhang dewïong mynta ka la ïaid la 12 snem hynrei ka Sorkar kam shym la lah ban plie biang ïa u dewïong bad kane ka la wanrah jingeh ïa ki paidbah ban pyndap pynbiang ïa ka ïing ka sem.
Ha kajuh ka por u la pyntip ba ka seng ka la phah jingthoh sha u Myntri Rangbah ka Jylla mynta la shi bnai ban dawa ban plie noh ïa ka jingtih dewïong.
