Mawkyrwat, Jymmang 09
Ka ophis jong ka SAI Computers Limited kaba dei ka kompeni sam bording kaba don ha ka shnong Pamdaba kaba hap hapoh ka Ranikor Civil Sub-Division ha South West Khasi Hills District ka la shah wiang ding ha ki runar bym lah ban ithuh, kaba la jia ha ka miet jong ka 7 tarik mynta u bnai.
Katkum ka tyllong khubor na ki pulit, la ïathuh ba ha ka sngi kaba bud, kata ka 8 tarik, ki pulit ka Ranikor ki la ïoh pdiang ïa ka ejahar na u Rajeev Ranjan Kumar, uba dei u Project Manager jong katei ka kompany bad katkum ka ejahar la kdew ba ka ophis jong ka SAI Computer kaba don ha Ranikor-Pamdaba ka la shah thang dusmon ha ki briew ki bym lah ban ithuh.
La ïathuh ruh ba ha katei ka jingjia, ki tiar ki tar, ki kot ki sla jong ka ophis kynthup ïa ki kor computer bad kiwei pat ki tiar ki la ingkhong lut bad ka jingjulor la antad ba ka la kot sha ka T.2 lak shiteng haduh 3 lak tyngka.
Halor katei ka jingjia, ki pulit ki la register ïa ka mukotduma ha thanad Ranikor lyngba ka Case No. 04/2026 hapoh ki Section 326(g)/3(5) BNS bad ka jingtohkit ka la ïaid shakhmat ban lap ïa ka daw tynrai bad ban kem ïa ki briew kiba donkti ha kane ka kam.
