Shillong, Jylliew 09
Ka Executive Committee jong ka Khasi Hills Autonomous District Council (KHADC) na ka jingïalang jong ka, ha 08 tarik u Jylliew, 2026, lyngba u Bah Winston Tony Lyngdoh, Chief Executive Member (CEM), ka la pynkhreh ban wanrah jingkylla ha ki katto katne ki Act bad ki Rules ha ka sien shong dorbar, ka ban sdang ha ka 17 tarik u Jylliew, 2026.
Haba pyntip halor ki rai na ka jingïalang, u Bah Winston u la ong, ba kan don ka jingpynkylla da kaba wanrah ïa ka Trading By Non-Tribals Regulation Amendment Bill, 2026.
U la ong ba ka don jingïatyngkhuh bad ka Sorkar Jylla halor ka Labour Licence Certificate bad kumta ka KHADC kan nym tuklar shuh halor kane.
Nalor kane u la ong, ba yn wanrah ïa ka Service Rules 2026, ka Amendment jong ka KHADC Administration of Land Act 2021 halor ki Raid, ka Fisheries Act 1954 ha kaba la don ki jingjia daiñ kuna ïa ki nongshong shnong ha ki Hima bapher-bapher, kaba ki daiñ kuna haduh 50 hajar tyngka marwei.
Haba ïadei bad kane ka aiñ, kam shym la don kano-kano ka jingpynshai ba kumno ki Hima kin daiñ kuna bad katkum ka jingtip ba kane ka Fisheries Act ka la don, ka jingdaiñ kuna ka poi tang 10 hajar tyngka. Ïa kane ngin sa ïakren bad pynshai ha ka dorbar ban sa wan, la ong u CEM.
Halor ki Bill kiba dang ap jingmynjur na u Lat, u Bah Winston u la ong ba ki dang bun kiba sahkut bad ka Sorkar Jylla, ïa kaba um pat wad jingtip bniah haduh katno tylli ki don.
