Shillong, Jylliew 10
Ka Sorkar Meghalaya kala rai ban pynsangeh shuwa ïa baroh ki jingleit shabar ri bala bei tyngka da ka Sorkar da ki Myntri Sorkar, ki MLA bad ki ophisar Sorkar na ka bynta ka por ba hynriew bnai kum shibynta jong ka jingpyrshang ban pynduna ïa ka jingpynlut pynsep bad ka sienjam ban tyngkai ïa ka pisa ka Sorkar.
Ïa kane ka rai la shim na ka bynta ka jingmyntoi jong u paidbah ba bun balang.
Kane ka sienjam kala wan ha ka por ba ki Sorkar ha kylleng ka Ri kila pyndonkam ïa ka jingstad ha ka liang ka jingpyndonkam ïa ka pla tyngka namar ka jingbym long thikna ha ka ïoh ka kot na ki jingjia ba dang jia mynta ha ka pyrthei, kynthup ka jingïakynad saiñ-pyrthei hapdeng ki Ri bad ki jingeh haba ïadei bad ki jingdon jingem jong ka Foreign Exchange.
Ka Sorkar Jylla ka ngeit ba ka jingpynïaid kaba stad ïa ka jingpynlut pisa ka long kaba donkam bha ban pynthikna ba ki jingdon jingem kin ïai long beit na ka bynta ki kam kiba kongsan bad ki jingkular ha ka roi ka par.
Kum ka jingmih na kane ka rai, phra tylli ki Foreign Study Visit bad Exposure ba kynthup ïa kumba 63-68 ngut ki ophisar bad ki Nongmihkhmat na ki tnad bapher-bapher la pynsangeh shuwa.
Kine ki kynthup ïa ki prokram ba ïadei bad ka synshar khadar, ka jingpynroi ïa ka kam ri jingri, ka jingnang pyndonkam ïa ka um kaba lah ban ïakhun pyrshah ïa ka jingkylla ka suiñbneng, ka rukom treikam ha ka koit ka khiah, ka jingpyntreikam ïa ki projek, ka jingsumar ïa ka mariang bad ka rukom pynïaid ïa ka kam jied nongmihkhmat.
Kane ka jingleit bar ri bala pynsangeh ka kynthup ïa ki jaka kum ka United Kingdom, Denmark, United States, Japan, Thailand, Vietnam bad Argentina.
Ka Sorkar kala ban jur ba ïa kane ka rai ym dei ban peit kum ka jingweng noh na ki jingpynïadei bad ki Ri ka pyrthei lane ka jingïasam ïa ki jingnang jingtip. Hynrei, ka pyni ïa ka jingpynsangeh ba tang shipor ha ka jingpynlut pynsep na ka jingleit bar ri haba pynthikna pat ban pynbteng ïa ka jingpynleit jingmut ha ki kam ba kongsan ha ka synshar khadar hapoh ka Jylla.
Bun na kine ki jinghikai bad ki jingïatreilang bala thmu yn sa wad lad noh lyngba ka jingïakren online, ka jingïatreilang ha ka liang ka technical bad ki kabu ba hadien habud hadien bala kut kane ka por ba pyrkhing.
La pyntip ba ka jingpynbna bala pynmih da ka Sorkar Jylla kam treikam satia ïa ki jingleit bar ri kiba la bei tyngka da ka Sorkar India lane ba la bei tyngka pura da ki Multilateral Development Bank, kaba shong pat ha ka jingïoh jingmynjur na ka Ministry of External Affairs, ka Sorkar India.
