Shillong, Jylliew 10
Ka Khasi Students’ Union West Jaiñtia Hills District Unit, ka KSU War Jaiñtia Circle ha ryngkat ka jingïatreilang bad ka Federation of Khasi-Jaiñtia and Garo People West Jaiñtia ha ka 10 tarik u Jylliew 2026 ka la leit ban khynra ïa ki trok bar Jylla kiba wan kit mar ha ki bynta ka War Jaiñtia.
Ha kane ka jingkhynra ki ar seng ki la lap haduh 200 tylli ki trok bar jylla kiba wan ban kamai khlem ki kot ki sla ki ba biang, kum ka Trading License bad kiwei de. Hadien ba la lap ïa kine ki trok bar Jylla kiba wan kamai be-aiñ ki ar seng ki la pynher krad bad beh noh ïa ki sha ka jaka ba ki wan.
Haba kren halor kane u President ka KSU West Jaiñtia Hills District Unit u Samla Laitphar Syngkrem u la ong ba kane ka jingïoh wan kamai sahuh ki trok bar jylla, ki la knieh noh ïa ka lad kamai jong ki trai ri trai muluk.
Nalor kata u la maham jur ruh ïa kino-kino ki trai parmaw, ki nongkhaïi bad nongshalan maw sha Bangladesh ba kim dei ban ai jingïada ïa ki bar Jylla kiba wan kamai khlem ki kot ki sla kiba biang bad bynrap ba lada jia eiei ïa kine ki bar Jylla, kito kiba wanrah ki dei ban shim ïa ka jingbahkhlieh.
U la kren bynñiaw ruh ïa ka jingbym ai ka Sorkar ïa ka ILP bad ong ba kum ka seng kan ym man thait ban shim hi ïa ki lad jingïada na ka jingwan ki mynder sha kane ka Ri, u la ong ba kum ka Jaidbynriew kam dei ban ai jaka rieh ïa ki bar Jylla namar ki long kum ki ‘seiñpuh’ kiba lah ban puh ha kano-kano ka por.
Haba bynrap, u General Secretary ka FKJGP West Jaiñtia Hills u Samla Nangkhraw Rani u la pynrem jur ïa ka jingbym shimkhia ka JHADC ban tehlakam ïa ki trok bar Jylla kiba kamai khlem ki kot ki sla katkum ka kyndon aiñ ba la pynkupbor ïa ka, ha kaba ïadei ka jingwan khaïi pateng da ki bar Jylla.
U la ong ba kane ka jingwan ki trok bar jylla ym tang ba ki la wan kamai khlem ki kot ki sla, hynrei ka long ruh ka jingknieh ïa ka kamai kajih jong ki trai muluk kiba im ja na ka kam ñiah trok.
