Shillong, Jylliew 10
U nongïalam ka BJP bad MLA ka Pynthorumkhrah, Bah A.L. Hek ha ka Sngi Balang u la ong ba u Myntri ka tnad ka koit ka khiah ka Sorkar Pdeng, u J.P. Nadda u la ai ka jingkular ba ka Sorkar Pdeng kan sa khmih bniah ïa ka jingdawa ban pynbna ïa ka North Eastern Indira Gandhi Regional Institute of Health and Medical Sciences (NEIGRIHMS) kum ka Institute of National Importance (INI).
U Bah Hek u la ong ba u la buddien ïa kane ka mat la katto-katne por mynta kynthup na u Myntri ka koit ka khiah barim bad u la pynsngew biang ïa kane ka kam ha ka por ba u Nadda u la wan jngoh ïa ka Jylla.
“Haba ïadei bad ka INI ïa ka NEIGRIHMS, nga la thoh sha u Myntri barim ka koit ka khiah bad u la kubur ba kane ka kam ka dang don hapdeng ka jingpyrkhat,” ong u Bah Hek sha ki lad pathai khubor.
U la bynrap ba na ka liang ki nongtrei ka NEIGRIHMS ruh ki la aiti ïa ka dorkhast sha u Myntri ha ka por ba u wan jngoh ban plie ïa ka ‘Hospital’.
“Dang shen, haba u Myntri ka tnad ka koit ka khiah ka Sorkar Pdeng, u J.P. Nadda u la wan ban plie ïa ka ‘Hospital’, nga la ïoh lad ban ïakynduh ïa u. Ki nongtrei ka NEIGRIHMS ruh ki la ai ka shithi ban kyrpad na u ban pynbna noh ïa ka NEIGRIHMS kum ka Institute of National Importance. U la ong ba un sa eksamin ïa kane ka jingtyrwa. U la kular ha nga ba un sa pyrkhat haba ïadei bad kane,” ong u Bah Hek.
Katkum ka jingong jong u, lada mynjur, ka kyrdan INI kan ai sha ka NEIGRIHMS ïa ka jinglaitluid kaba khraw ha ka liang ki kam pisa-tyngka bad ka jingpynïaid kam, kaba ïasyriem kum ka AIIMS.
