Jowai, Jylliew 10
Ka Jaiñtia National Council (JNC) Western Zone ha ka 9 tarik Jylliew ka la leit ïakynduh ïa u Myntri ka tnad pule puthi u Bah Lahkmen Rymbui ha kaba ka la kyntu ba un tuklar lem mardor ban pynmih noh kham kloi ïa ka jingpynbna lait kam nonghikai hapoh ki skul Lower bad Upper Primary da kaba pynpaw ba ki don haduh palat 31,000 ngut ki kyrtong kiba la pass ïa ka MTET bad ap ban ïoh kam katba da ki spah tylli ki kam ki lait thylli ha kylleng ka Jylla.
Ka JNC-WZ hapoh ka jingïalam jong u President Bah Hamehi Bamon ka la aiti ruh ïa ka dorkhas sha u Myntri haba pynpaw ruh ba ki don haduh kumba 677 tylli ki kam nonghikai kiba lait ha kine ki skul Sorkar ha kylleng ka Jylla da kaba maham ruh ba ka jingpynslem kan ktah jur ïa ki hajar ngut ki kyrtong kiba la pyndep ïa ka MTET khamtam kito kiba la jan ne palat ïa ka rta thep kam.
Ka seng ka la pynpaw sha u Myntri ba ka jingduna nonghikai ka long ha kylleng ka Jylla, kata naduh na East Khasi Hills sha South Garo Hills, kaba la pynlong ïa ki kamra klas ba kin mad jingeh namar jingduna nonghikai bad kaba ktah jur ïa ka pule puthi.
Ka la ong ba ki kam kiba lait kim dei tang ha kawei ka thaiñ, hynrei ha kylleng, kata naduh ha Shillong bad Sohra, East Khasi Hills, Nongpoh, Ri-Bhoi, Nongstoiñ bad Mairang ha West bad Eastern West Khasi Hills, Mawkyrwat ha South West Khasi Hills, Jowai bad Amlarem ha West Jaiñtia Hills, Khliehriat ha East Jaiñtia Hills, Tura bad Dadenggre ha West Garo Hills, Ampati ha South West Garo Hills, Williamnagar ha East Garo Hills, Resubelpara ha North Garo Hills bad Baghmara ha South Garo Hills.
“Ka jingsngewkhia kaba kongsan ka long na ka bynta ki palat 31,000 ngut ki kyrtong kiba la pyndep ïa ka MTET hynrei kim don satia kino-kino ki jingpynbna lait kam ba ki ïohlad ban thep,” ong ka JNC ha ka dorkhas.
Ka seng ka la kynthoh ba ka jingduna nonghikai kaba jur ka don ïa ka jingïadei beit-beit bad ka jinghiar arsut ha ka liang ka pule puthi ha ki skul Sorkar, bad bynrap ba ka jingpynkhlaiñ ïa ka jingdon nonghikai ka long kaba kongsan bha.
Kumta ka seng ka dawa ïa ka Sorkar ba kan pynmih noh kham kloi ïa ka jingpynbna lait kam khnang ban pynthikna ïa ka jinglong kaba khuid bad ba shai bad kaba kynthup lang ïa baroh, bad ban lah ban weng ïa ka jingduna nonghikai ha ki skul ha kylleng ka Jylla bad ka la ong ruh ba ka jingnang hiar arsut ha ka kam ai jinghikai ha Meghalaya ka dei kaba don jingïadei bad ka jingduna ki nonghikai.
“Ka jingpynkhlaiñ ha ka jingdon ïa ki nonghikai kan ym weng tang ïa ka jingbym ïohkam ïohkam hapdeng ki kyrtong kiba la pass hynrei kan kyntiew ruh ïa ka pule puthi hapoh ka Jylla Meghalaya,” ong u Bah Bamon.
“Na ka liang u Myntri u la kular ba ka Sorkar kan sa shim ïa ka sienjam kaba donkam bad ka lah ban pynmih ïa ka jingpynbna lait kam jong kine ki kam nonghikai kiba lait hapoh kine ki khyndiat bnai ban wan,” u la bynrap.
