Shillong, Jylliew 10
U nongïalam ka BJP uba dei ruh u MLA ka Pynthorumkhrah, Bah A.L. Hek ha ka Sngi Balang u la kyntu ïa ka Sorkar Jylla ban pynlong ïa ka jingkhmih bniah halor ka jinglah ban treikam, hashuwa ban wanrah ïa ka Inner Line Permit (ILP) lane ka Meghalaya Residents Safety and Security Act (MRSSA).
Ha kajuh ka por, u la ban jur ba kano-kano ka lad treikam kaba thymmai ka dei ban pynïabiang tara ïa ki jingmyntoi jong ki nongshnong shnong trai ri bad kito kiba wan jngoh kai sha ka Jylla.
Haba kren sha ki nongthoh khubor halor kane ka mat, u Bah Hek u la ong ba ka jingpynleit jingmut ka dei ban long halor kaei kaba “lah ban leh” bad kaba ai jingmyntoi na ka bynta baroh ki nongshim bynta.
“Ha kaba ïadei bad ka ILP bad ka MRSSA, nga kyrpad ïa ka Sorkar Meghalaya bad ïa ki paidbah nongshnong shnong ka Jylla ba ha kano-kano ka por ba ngi thmu ban wanrah ïa ka ILP ne MRSSA ha Meghalaya, ngin hap ban peit shuwa kaei kaba lah ban leh. Kaei kaba lah ban leh bad kaei ka bym lah,” ong u Bah Hek.
U la bynrap ba ka jingpyrkhat ba hakhmat eh ka dei ban long ïa ka bha ka miat jong ki nongshong shnong ka Jylla, da dang buh jingmut lang ruh ïa ki briew kiba nabar, khamtam ïa ki nongjngohkai pyrthei.
“Kumta, tang ka bynta kaba lah ban leh ka dei ban long kaba myntoi na ka bynta baroh ki paidbah, ym tang na ka bynta ki nongshnong shnong ka Meghalaya. Nyngkong eh, ngi hap ban peit ïa ka jingmyntoi jong ki paidbah ka Jylla Meghalaya bad kumjuh, ngi hap ban peit ruh ïa ka jingshngaiñ bad jingmyntoi jong ki paidbah kiba wan sha ka Jylla Meghalaya, khamtam eh ïa ki nongjngohkai pyrthei,” u la ong. Haba kylli shaphang ka lynti ban ïaid shakhmat, u Bah Hek u la ai jingmut na ka bynta ban pule bniah bad ban pyntikna ba kano-kano ka aiñ kan ym ktah jur ïa ka jingrit paid ka Jylla ne pynthut ïa ki nongwan jngohkai.
“Ka Sorkar ka dei ban peit ïa kaei kaba lah ban leh bad ka ban ym ktah ïa ka jingrit paid jong ka Jylla Meghalaya bad ïa ki briew kiba dang wan sha Meghalaya. Kumta, ngi hap ban pule bha shuwa ban wanrah ïa kine sha ka Jylla Meghalaya. Ngi hap ban pule bniah, hynrei kaba kongsan ka long ba ka dei ban long kaba lah ban leh na ka bynta ka jingmyntoi jong ka Jylla bad na ka bynta ka jingmyntoi jong ka ri kumjuh,” la ong u Bah Hek.
