Shillong, Jylliew 10
U nongïalam ka BJP bad Myntri barim ka Sorkar Jylla, Bah A.L. Hek ha ka Sngi Balang u la ong ba u la ïakynduh ïa ki nongmihkhmat na ka Conference of Catholic Bishops of India (CCBI) bad North East India Christian Council (NEICC) ban ïakren halor ka jingtyrwa ba ïadei bad ka Foreign Contribution (Regulation) Amendment Bill, 2026. Ha kajuh ka por, u la kyntu ïa ka Sorkar Pdeng ban ïamir jingmut bad baroh ki nongshim bynta hashuwa ban wanrah ïa ka.
“Ngi la ïakynduh ïa u Deputy Secretary ka CCBI ha ka 8 tarik Jylliew. Ngi la don ruh ka jingïalang bad ka NEICC, ngi la ïakynduh ïa baroh ki Pastor ban ïakren halor kane,” ong u Bah Hek. U la ïathuh ruh ba la dep ban phah ïa ka shithi sha u Myntri Rangbahduh ka ri ban kyrpad na ka bynta ki jingïakren kiba ïar.
“Ngi la phah ïa ka shithi sha u Myntri Rangbahduh ba hashuwa ba phin wanrah ïa kane ka ‘FCRA Amendment Bill’, dei ban kynthup lang ïa baroh ki nongshim bynta,” u la ong.
Na ka liang u Bah Hek u la ai khublei ruh ïa u Myntri Rangbahduh, u Narendra Modi halor ka jingdap 12 snem ka jingshakri jong u ha ophis kum u Myntri Rangbahduh ka Ri.
“U dei u Myntri Rangbahduh uba la shakri slem tam ïa ka ri jong ngi bad ngi khmih lynti na ka bynta ka ‘Viksit Bharat’ ha u 2047. U dei u nongwanrah jingkylla,” ong u Bah Hek.
