Shillong, Jylliew 10
Ka Hynñiewtrep Integra-ted Territorial Organisa-tion (HITO) Southern Border Area Circle ka la khang khyrdep shi syndon ïa ka jaka theh umphniang kali kaba don ha Ranikor namar ka jingleh kynshleiñ kynthei u ‘Manager’ jong katei ka jaka theh umphniang kali.
Haba kren halor kane u Samla Rising Star Marweiñ Secretary ka HITO Southern Border Area u la ïathuh ba katkum ka jingïoh jingujor ka seng na kawei ka longkmie kaba trei ha katei ka jaka theh umphniang kali, ka la kynnoh ïa utei u ‘Manager’ ba u la tyrwa pisa ïa ka T.5000 ba kan ïathiah bad u myn ha ka step 01 tarik u Jylliew 2026.
La ong ba katei ka longkmie ka la kyntait ïa kata ka jingtyrwa jong utei u ‘Manager’ bad ka la leit ïathuh ïa kane sha ki bahaïing jong ka, kiba la wan ïakren bad ki trai nongpynïaid katei ka jaka theh umphniang kali, hynrei kam shym la don kano-kano ka jingshimkhia haba ïadei bad kane.
Kumta kane mat ka la poi sha ka seng kaba la wan ban khang tala shi syndon ïa katei ka jaka theh umphniang kali bad beh syndon ïa utei u ‘Manager’ bad ka seng ka la pynpaw ba ha ki por ba la dep ruh ka don ka jingmudui ïa kane ka jaka theh umphniang kali ba ka don ka jingïashad ïalehkmen sha ba palat pud.
Ka HITO ka la kyntu ïa ki bor ka aiñ ba kin shimkhia ban leh ïa kaba donkam halor kane ka jingjia bad kyntu ruh ïa ki trai jong katei ka jaka theh umphniang kali ba ki dei ban buh nongtrei da ki para Khasi.
