Shillong, Jylliew 10
U Myntri barim ka Sorkar Jylla bad nongïalam ka BJP, Bah A.L. Hek ha ka Sngi Balang u la kyrpad na ka Sorkar Pdeng ban ai noh ka jingithuh ïa ka ktien Khasi bad Garo hapoh ka Riti-Synshar ka Ri da kaba pynrung ïa ki ha ka Khyrnit ba 8, hadien ba ka Sorkar Jylla dang shen ka la pynmih ïa ka ‘Ordinance’ halor ka kyrdan ktien Sorkar.
U Bah Hek u la ong ba ka Jylla ka la dep ban shim ïa ka sienjam ba donkam bad kaba kongsan bad ka jingpynleit jingmut mynta ka dei ban phai sha New Delhi.
“Ka jingpynrung ïa ka ktien Khasi bad Garo: Dang shen ngi la ïohi ba ka Sorkar MDA-II ka la dep mynjur ïa ka ‘Ordinance’ kaba la mynjur da u Lat ka Jylla. Ngi la leh ruh ïa kane ha ki por ba la dep lyngba ka ‘Ordinance’,” ong u Bah Hek.
U Bah Hek u la kdew ba watla baroh ar tylli ki ktien ki treikam kum ki ‘Associate Official Language’ jong ka Jylla, hynrei ka jingithuh ka dang dei tang ha ki kyrdan jong ka Jylla.
“Hashuwa ruh bad mynta kumjuh, ha ka Jylla Meghalaya, ka Khasi bad Garo ki dei ki ‘Associate Official Language’. Mynta ruh ka dei tang lyngba ka ‘Ordinance’,” u la bynrap.
Une u nongïalam ka BJP u la ong ruh ba ka seng kan pynbor ïa ka Sorkar Pdeng ban pyndep ïa kane ka kam.
“Mynta, kaba kongsan hangne ka long ba ngi hap ban kyrpad ïa ka Sorkar India ban pynrung ïa ka ktien Khasi bad Garo ha ka Khyrnit kaba 8 ban ïoh ïa ka jingithuh ba pura,” ong u Bah Hek.
Haba kylli shaphang ka bynta jong ka BJP, u Bah Hek u la ong ba ka jingdon nongmihkhmat jong ka seng ha ka Sorkar MDA ka pyni ïa ka lynti kaba beit ban tynruh haba ïadei bad kane ka jingdawa.
“Ka BJP ka don 2 ngut ki MLA, ha kaba uwei u dei u Myntri Sorkar bad ngi buddien ïa kane ban pyntikna ba ka Sorkar India kan ithuh noh ïa ka ktien Khasi bad Garo da kaba pynrung ha ka Khyrnit kaba 8 jong ka Riti-Synshar ka Ri India,” la ong u Bah Hek.
