Shillong, Jylliew 10
U MLA ka Mawkynrew Constituency u Bah Banteidor Lyngdoh ha ka 9 tarik u Jylliew 2026 u la sam haduh 70 tylli tam ki ‘Work Order’ ba la mang na ka skhim Special Rural Works Programme (SRWP) 2025-26 sha ki nongïoh myntoi na bynta ban pyntrei ïa ki jingtrei bapher-bapher.
La pynlong ïa ka jingïalang ba lyngkot ha ïingsah u MLA kaba don ha Thangsning ha kaba ki nongïoh myntoi kiba wan na ki shnong bapher-bapher jong ka Constituency da ka jingkmen ki la wan ban ïashim bynta bad ban ïohpdiang ïa ka ‘Work Order’ na kti u MLA.
Ha kane ka jingïalang la ïadonlang u Bah SS Giri Lyngdoh uba long u Junior Engineer ka Mawkynrew C&RD Block, u Bah Andra Rynjah President NPP Mawkynrew Block, u Bah Traibor Nongkhlaw Working President NPP Mawkynrew Block, ka Kong Lomida Nongkynrih President Women’s NPP Mawkynrew Block bad ka Kong Sident Rynjah Women Working President NPP Mawkynrew Block bad kiwei-kiwei ki ‘riew Rangbah.
Ki ‘Work Order’ ba u MLA u sam ha katei ka sngi ki kynthup ban pynbha ïa ki ïing Skul, ban shna ïa ki ïingbaduk, ki paiñkhana, ki lynti ïaid kjat, ki jingkieng (footbridge) bad ki kynroh (raiting wall) ha kaba ka jinglut ka la kot sha ka T.1 klur duna.
Shuh-shuh u MLA u la sei ruh nalade ban thied kawei ka ‘Wheelchair’ ïa kaba u la ïoh ban aiti sha u samla Wanlambok Lyngdoh u bym lah ban ïaid.
Haba kren ha katei ka jingïalang u Bah Banteidor Lyngdoh u la ong kham bunsien u ju ai skhim ïa ki skul, kum ha kaba shna ïa ki ïingskul bad pynbha ïa ki jingdonkam ha ki skul, da kaba u la pynpaw ruh ba ka thong jong u ka long ban kyntiew ïa ka pule puthi hapoh ka thaiñ bad u la kdew ruh ba ka pule puthi ha ka thaiñ ka la sdang ban kiew ban ïa ki por ba la dep.
Shuh-shuh u la ong ba ka jingai skhim jong u ban shna paiñkhana ka long ba u kwah ba ki shnong ki thaw kin long kiba khuid bad kiba la lait na ka jingleit bar pathar.
U la ban jur ïa kiba ïoh myntoi lyngba kane ka skhim ba kin ai ka jingïatreilang ban ïa peit ïa khmih lang ïa ka bit ka biang lang, khamtam lei ba ki dei ban pyntreikam hok ïa ka skhim kaba ki la ïoh pdiang khnang ba kan long ka jingmyntoi ïa ki hi bad ïa ka imlang ka sahlang.
