Shillong, Jylliew 10
U Myntri ba khmih ïa ka tnad bording Bah Metbah Lyngdoh ha ka sngi Balang u la ïathuh ba ka Meghalaya Energy Corporation Limited (MeECL) kan sa shimti hi noh ban sam bording ha Mawsynram Sub-Division hadien ba ka Sorkar kala rai ban pynkut noh ïa ka jingshakri ka SAI Computer Ltd.
Kane ka rai kala mih hadien ka jingdawa na ki MLA ka thaiñ kynthup ïa u MLA ka Mawsynram, Mawphlang bad Ranikor.
“Ngi la rai ban pynkut noh ïa ka shithi bala ai sha ka SAI Computer Ltd bad ka Corporation kan sa shimti hi noh, ka mat hangne ngi kwah ban ong ka long ba ngi kwah ban ïohi ba ki paidbah jong katei ka thaiñ kim dei ban mad ïa ki jingjynjar na kaei ka rai kaba ngin shim. Ngi kwah ban ïohi ba ka jingshimti kan long kaba ïaid beit ïaid ryntih bad ngi kwah ban ai ïa ka jingshakri kaba biang eh ïa ki paidbah,” ong u Bah Metbah haba ïakren bad ki nongthoh khubor.
U ong ba ka Sorkar kala shim ïa ki jingai jingmut ki stad aiñ namar kane ka kam ka long sub judice, bad kane ka sienjam ka long beit thik tang ïa ka Mawsynram Sub-Division.
Halor ka jingai pynïaid noh sha ki kompeni shimet ïa ka MeECL, u Bah Metbah u la pynshai ba ka Sorkar kam don satia ïa kum kane ka jingthmu bad kala pynleit jingmut ban pynkhie im ïa kane ka tnad.
