Nongpoh, Jylliew 11
Ki nongïalam jong ka Wah Umlew Protection Committee kaba seng da ka jingsnohkti ki khyndai tylli ki shnong kiba hap ha ka thaiñ Nongtraw ha Ri Bhoi District ha ka sngi Palei ki la mih shakhmat ban pynpaw ïa ka jing-sngewsih jur halor ka jingkylla rong ka Wah Umlew namar ka jingtih ïa ka surok thymmai kaba pynïasoh na Nong-kohlew sha NEIGRIHMS da ka Dhar Construction Company.
U Secretary ka Com-mittee Bah Pynskhem-lang Sohtun haba kren sha ki lad pathai khubor, u la ong ba ka Wah Umlew ka dei kawei na ki wah kiba khuid ba suba bad kaba ai jingmyntoi shikatdei ïa ki paidbah bad ka komiti kaba la seng naduh ki por kiba mynshwa, kala ri kala sumar ïa kane ka wah ym tang ban pynneh ïa ka jingkhuid ka jingsuba ka jong ka, hynrei wat ïa ki dohkha dohpnat ruh kiba don hapoh kane ka wah.
Utei u nongïalam ka komiti u la ïathuh ruh ba ha ka jingjurip ban wad ïa ka daw jong kane ka jingjaboh bad kylla rong ka Wah Umlew, ka komiti kala leit ban ai da ka jingthoh sha u Manager ka Dhar Construction Company ha ka 20 tarik u bnai Jymmang ban kyntu ba ka kompani ka dei ban shimkhia bad ban shim ïa ki lad jingïada ba kan nym don kano kano ka jingktah ïa katei ka Wah kaba katei ka surok thymmai kan ïaid lyngba.
U Bah Pynskhem u la pynpaw ïa ka jingsngewsih jur ba wat hadien katei ka jingai jingthoh ka komiti, ka Dhar Construction Committee ka khlem leh eiei kat haduh mynta katei ka wah kala kylla rong syndon bad kane ka buh jingma ïa ki dohkha dohpnat kiba im hapoh katei ka wah bad buh ruh ïa ka jingjynjar shikatdei ïa ki paidbah na kiba bun tylli ki shnong kiba ju pyndonkam ïa katei ka wah ha ki bynta bapher-bapher.
U la pynpaw ruh ba ka komiti hi kam don satia kano-kano ka jingpyrshah haba wan ki kam pynroi, hynrei ka daw kaba la pynlong ïa ki ban mih shakhmat ka dei beit thik namar ka jingshah pynjaboh katei ka wah kaba la pynsngewsih ïa ki paidbah nongshong shnong ka thaiñ naba katei ka kompani kaba pyntrei ïa katei ka surok kam shym la shim satia ïa ki lad ban ïada na ka jingtuid ki khyndew bad jingjaboh jong ka Wah Umlew.
Halor kane ka bynta, ka komiti kala buh ïa ka jingkyrpad sha ka Sorkar Jylla ba ka dei ban shim ïa ki lad ki lynti ban leh ïa kaba donkam la ka dei ban pynshitom ruh ïa kino kino kiba pynjot ïa katei ka wah katkum ki kyndon aiñ bad lada na ka liang ka Sorkar Jylla bad ruh katei ka kompani kaba pyntrei ïa ka surok kam shim ïa ki lad jingïada nangne shakhmat, ka komiti kam banse ban hap shim pat da kiwei ki lad ki lynti kiba kham tyngeh.
