Shillong, Jylliew 11
U Symbud Myntri Rangbah u Bah Sniawbhalang Dhar u la ïathuh ba ka Sorkar ka dang ap ïa ki jingai jingmut ïa kiwei pat ki lad ne ki buit tih par ba thymmai na ki nongkhaïi Dewïong ka East Jaiñtia Hills hashuwa ban pynlong ïa ka jingïalang bad u Myntri Rangbah ban pynsngew ïa kane ka kam sha ka Sorkar Pdeng.
Haba kren sha ki nongthoh khubor u Bah Sniawbhalang u la ong “Nga la dep ïakynduh ïa ki nongkhaïi Dewïong na East Jaiñtia Hills.
Ngi la don ïa ka jingïakren kaba seisoh bha bad mynta ngi dang ap ba kin aiti ïa ki jingtyrwa ba ïadei bad ka rukom tih Dewïong ba thymmai sha ka Tnad Mining & Geology”.
U Bah Sniawbhalang u la ïathuh ba ki nongkhaïi ki la pynpaw ba ka jingtih Dewïong da ka jingstad saïan ka dei ka bym ïahap satia ha Ri-Lum Jaiñtia. “Ki la pynpaw ba ka jingtih Dewïong da ka jingstad saïan kam ïahap satia ha ka thaiñ. Na kata ka daw ka Sorkar ka la ong ba kin aiti ïa kiwei pat ki buit bad ki jingai jingmut bad ngi dang ap ïa kane,” u la ong bad u la bynrap ba marsyn ïoh ïa ka jingtyrwa kin sa shong jingïalang.
U la ïathuh ba u Myntri Rangbah un sa lum ïa ka jingïalang bad kin sa ïakren lang hapdeng ka Sorkar bad ki seng jong ki nongkhaïi Dewïong kiba dei na kylleng ki bynta jong ka Jylla.
U Bah Sniawbhalang u la ïathuh ba ki nongkhaïi ki la pynsngew ïa artylli ki mat kiba kongsan ba donkam ban leh eiei. “Ka jaka ba la buh hapoh ka polisi ba mynta ka heh palat. Kumta, ngi la kyrpad ïa ka Sorkar India ban pynduna ïa ka jingheh ka jaka. Ka jingtih Dewïong da ka jingstad saïan kam ïahap bad ka jinglong jingman ki jaka ha Ri-Lum Jaiñtia,” u la ong haba ïathuh ba ka Sorkar Jylla kan sa rah ïakren ïa kane ka kam bad ka Sorkar Pdeng.
