Shillong, Jylliew 11
U National Vice Presi-dent jong ka NPP bad Symbud Myntri Rang-bah ka Jylla u Bah Sniawbhalang Dhar ha ka sngi Palei u la pynpaw ka jingsngew skhem pura ba ka NPP kan ïoh ïa ka jingjop ha ka ilekshon MP shiteng samoi na Shillong, da kaba ïaroh ruh ïa ki nongtrei kiba la ïai trei ha kylleng ki bynta jong ka Jylla.
Haba kren sha ki lad pathai khubor, u Bah Sniawbhalang u la ong, “Ngi sngew skhem pura ba ngin jop ha kane ka kynti da ka jingkyrshan pura jong ki paidbah. Na ka liang jong ka seng, ngi hap ban trei shitom. Nga ai khublei ïa baroh ki unit ha ki kyrdan bapher bapher ha kylleng ki konstitwensi kiba la trei shitom. Ki Unit ka NPP ki la trei shitom bad kumta ka long shisha ka dak jong ka jingkyrmen ha kane ka ilekshon MP shiteng samoi ban wan.”
Halor ka jingkylli ba ka NPP kam shym la sei da ka kyrtong kynthei, u Bah Sniawbhalang u la ïada ïa ka rukom jied kyrtong jong ka NPP.
U la ong ba ïa ka rai la shim hadien ba la dep ban pynlong ïa ka jingïasyllok bad ki unit jong ka seng ha kylleng jong ka Jylla.
“Kata phi lah ban kylli na ki. Na ka bynta ka NPP, ngim ju rai tang da ki nongïalam ba halorduh jong ka seng. Ngi ju sngap beit ïa ki jingai jingmut na baroh ki unit na ki 36 tylli ki konstitwensi. Ki la ai jingmut ïa ka kyrteng jong u Dr. D.R.L Nonglait bad ngi hap ban pdiang ïa kata,” u la ong.
U Bah Sniawbhalang u la kynthoh ruh halor ki khubor ba dang shen, ba ki nongkyrshan ka VPP ki la kynthih noh sha ka NPP, khamtam ha Rilum Khasi bad Jaiñtia.
“Hooid, nga la ïohi ïa kata. Khamtam ha Rilum Khasi-Jaiñtia, ki la hiar bha shibun. Wat ha Rilum Khasi, jan manla ka sngi, ki number ki dang hiar ha kylleng ki bynta jong ka rilum Khasi-Jaiñtia naba ki paidbah ki la sdang ban sngewthuh,” u la ong.
