Nongpoh, Jylliew 11
Ha kawei ka jingjia kaba la jia ha ka shiteng sngi jong ka sngi Palei, lai ngut ki briew kila ngat ha ka jingmynsaw jur bad ar ngut pat kila shu mynsaw malu mala hadien ba ka dukan bam kaba don harud ka surokbah National Highway 6 kala khyllem kynsan na ka jingshah tynrah ha ka kali Maruti Suzuki Swift kaba la pynher sted shaba palat pud.
Kane ka khubor ba la ïoh lum, la ïathuh ba katei ka jingjia ka dei ha ka por kumba 12 baje eiei kaba dang hap hapoh u pud u sam ka shnong Umdihar ha Ri Bhoi District.
La ïathuh ruh ba katei ka jingjia ka dei tang namar ba ka kali Maruti Suzuki Swift kaba don ïa u registration number AS01-GQ-2040 kaba dang hiar na nongbah Shillong kala pynher sted shaba palat haduh ba u nongñiah um lah shuh ban tehlakam ïa ka kali bad leit tynrah pynkhyllem syndon ïa katei ka dukan.
Katei ka dukan kaba la shah tynrah pynkhyllem ka dei kaba la long trai da ka Kong Lapilang Syngkli bad ka Kong Daiahun Lyngdoh bad ki briew kiba la ngat ha ka jingmynsaw jur ha kane ka jingjia, ki kynthup ïa u Bah Wanshanbor Lyngdoh, u Bah Bambukstar Syngkli bad u Bah Neverson Sylliang kiba dei na katei ka shnong Umdihar.
Halor kane ka jingjia, na ka liang ki bor pulit ki dang pynlong ïa ka jingtohkit bad ïa kiba mynsaw la pynkit noh mar mar sha Nongpoh Civil Hospital na ka bynta ban ïoh ïa ka jingsumar.
