Shillong, Jylliew 11
Ka jaka khappud hapdeng ka Ri India bad Bangladesh ha Nandir-char, kaba hap hapoh ka Mahendraganj Consti-tuency, South West Garo Hills, ka la kylla long ka jaka ïakynad kaba kham pher bad kaba ym ju jia koit mynno-mynno ruh.
Katkum ki durkhih kiba la saphriang ha ki rynsan social media, la ïohi ba ki shipai Border Security Force (BSF) ki la kem ïa uwei u nong Bangladesh uba la rung tuh sha India.
Hadien kata, la ong ba la pynphai biang ïa u sha shiliang jong ka khappud Bangladesh lyngba ka jingker sainar.
Hynrei, ki shipai Border Guard Bangla-desh (BGB) ki la kyntait ban pdiang ïa une u briew bad ki nongshong shnong na Bangladesh ruh la ïathuh, ba ki la kyrshan ïa ka rai ban ym pdiang ïa une u briew.
Kumta une u nong Bangladesh u la sahkut ha shiliang Bangladesh jong ka khappud, hynrei ym don ba kwah ban shim jingkitkhlieh ïa u tei uba la rung tuh sha India.
Ki durkhih kiba la saphriang ki pyni ïa u briew ba u ïaid khuslai hajan ka jingker sainar, katba ki shipai BGB, ki nongshong shnong bad ki BSF ki dang ïakajia bad ïatai halor kane ka jingjia.
Ha kawei na ki durkhih pat, la ïohsngew ïa uwei u shipai BGB uba pyrta da kaba ong, um dei shuh ka jingkitkhlieh jong ngi, da kaba kdew sha shiliang India.
Na ka liang ki bor synshar jong ar tylli ki ri haduh mynta kim pat pynmih kano-kano ka jingpynshai paidbah halor kane ka jingjia, kaba la pynmih jingkylli shaphang ka rukom pynïaid ïa ki kam khappud bad ki nongrung tuh.
