Nongpoh, Jylliew 11
U Bah Rocky A Marweiñ uba dei u nongïalam ba hakhlieh duh jong ka Congress ha Ri Bhoi, uba bat ïa ka kam kum u President jong ka Ri Bhoi District Congress Committee (RBDCC) ha kajuh ka por kum u President jong ka Umsning Block Congress Committee ha ka sngi Balang u la rai ban ïakhlad lok noh bad katei ka seng na ki daw shimet.
Ha ka shithi iehnoh kam kaba la phah sha u President ka Meghalaya Pradesh Congress Committee (MPCC), u Bah Rocky A Marweiñ u la ong ba ka jingshim rai ka jong u ban iehnoh ïa ka Congress ka dei hi na ki daw shimet bad ym dei satia na kino-kino ki jingbymhun ïa ka seng, ki nongïalam bad ki mat treikam ki jong ka.
U Bah Rocky u la ong ba u don ïa ka jingburom kaba khraw ïa ka Congress, ki nongïalam bad ki para nongtrei ha ka seng baroh bad ba u dap da ka sngewnguh ïa ki lad ki kabu kiba ka seng kala ai ha u ha ka jingtreikam bad ai ruh ka jingkitbok kitrwiang ba ka seng kan dang ïoh ïa ki jingjop ha ki sienjam kiba shakhmat ki jong ka.
Haba pyrshang ban wad jingtip pat shano un pynïasoh ïalade hadien ba u la mih noh na ka Congress, u Bah Rocky A Marweiñ u la jubab ba ïa mynta um pat lah satia ban ong eiei, hynrei ïa ka rai kaba khatduh hi un shim ha ryngkat ka jingsyllok bad ïamir jingmut shwa bad ki paidbah nongkyrshan ki jong u.
