Ka phutbol ka dei kawei na ki jingïalehkai kaba pynshongshit shi katdei eh bad ruh mynta ka kynti ngi la sakhi biang ïa ka jingwan long jong ka FIFA World Cup 2026, ha kaba ka pyrthei baroh ka la sakhi ïa ka jingsdang jong kane ka tamasa ba shisien saw snem, ka ban long ha ka Ri USA, Canada bad Mexico. Ki 48 tylli ki Ri kiba la pynkiew na ki 32 tylli ki Ri ba la sakhi ha u snem 2022 kin ïakhun na ka bynta kawei ka thong. Ka jingïalehkai phutbol ka long kawei na kiba itynnad tam bad ka khring lang ïa ki khynnah bad kumjuh ruh ïa ki rangbah. Ym don pat kum kawei ka jingïalehkai kaba lah ban pynshongshit kumba lah ka phutbol. Dei na kane ka daw ba u khlur ïalehkai bapawnam na Brazil, u Pelé (Edson Arantes do Nascimento), bad kiwei, ki ju ong ba ka phutbol ka dei ka jingïalehkai kaba itynnad (‘The Beautiful Game’ lane ‘o jogo bonito’ ha ka Portuguese). Haduh mynta mynne, ym pat don da kawei pat ka jingïalehkai ka ban lah ban shim ïa ka jaka jong ka phutbol ha ka jingshongshit bad jingitynnad. Lehse, yn ym don hi ruh da kawei pat ha ki sngi bad ki por ban wan.
Saw snem mynshwa, ka Qatar ka la long ka Ri kaba la pynïalehkai ïa ka FIFA World Cup ha kaba ka Argentina ka la long ka lahduh ha ka jingïakhun pyrshah ïa ka France, kaba dei ruh ka nam lahduh kaba u khlur ïalehkai phutbol ka pyrthei u Lionel Messi u la thrang bad ïoh rah syndon. Mynta ka kynti kane ka jingïalehkai kan long ha ki 3 tylli ki Ri, kata ha USA, Canada bad Mexico, bad kaba la sdang ha ka miet jong ka 11 tarik bad ngin hap ban ïa ap haduh ka 19 tarik Naitung ban tip mano ka Ri ka ban ïoh rang ïa u ‘nam jop. Barabor, ka World Cup ka wanrah ïa ka jingshongshit hapdeng ki nongpeitkai, hynrei katba nang mih ki snem, ka jingshongshit ka la kham pjah. Mynshwa, ha ka por ba ki TV (Television) ki dang duna bha ha Ri Khasi Jaiñtia, ki nongpeitkai ki ju leit shi lymbung sha ki ïing ki sem jong kito kiba don ïa kane ka kor ban ïoh peit ïa ka World Cup, kam pher la ka dei ha ka por phyrngap ne mynsngi ne mynmiet. Ki la don ruh kiba la leit rah syndon da ki TV sha ki shnong ki thaw kiba don ha khappud bad ka Bangladesh ban ïoh peit kham bha ïa ki jingïalehkai. Hashwa ban sdang ka World Cup, ki ju don bun bah kiba leit sha ki dukan ban thied ïa ki TV ban rah sha la ïing la sem. Ka ïew ka ju thnem bha. Shongshit lang kiba shu peitkai ïa kiba wan thied ïa ki TV!
Hynrei mynta pat ka la pher. Ka jingïapher ka long namar ka jingwan tyllep ki kor ki bor bapher-bapher. Mynta, ym donkam shuh ban da ïeng laiñ hakhmat ki dukan kiba die ïa ki TV ban ïa peitkai kumba ju long ha ki snem 1990 shaneng bad ter-ter haduh 2002 eiei. Ngi lah ruh ban sakhi ba ka jingdie ïa ki TV ka la hiar bha ym shuh kum ha kitei ki snem, ba tang dei ka World Cup la ïamareh leit thied TV sha ïew sha Hat. Mynta shu sei ïa ka ‘Mobile Phone’ kaba don bad ka ‘Internet’ bad la lah ban peitkai ïa ki jingïakhun. Mynshwa ïa peit paidbah, mynta ïa peit marwei! Ka jingkylla jong ka juk! Ngim ong ba kim don shuh kiba ïalum lang khrui ban peitkai. Ki don tangba ki la duna shaba palat. Sngewbynnud ba kito ki aïom bad ki sngi jong ka jingshongshit paidbah ki la duh noh. Ka ju don ka jingïatylli, ka jingsngew jan, ka jingbitar iwei ïa iwei namar ba shah rem noh ka Ri ba kyrshan, ka jingïania, ka jingbiria, bad ka jingïabam ïadih lang hapoh uwei u tnum u tyndai. Tangba ngim lah ban leh eiei na ka daw jong ka jingkylla jong ka por, bad kito ki por kiba la leit, kin shu sah tang ha ki jingkynmaw.
Ka aïom World Cup ka ju pynklet shipor ïa kiei-kiei kiba ngi mad ha ka jingim kum ki briew. Ngi buh jingmut beit kliaw ïa ki jingïakhun khamtam ynda la dei ka sngi ba ki Ri kiba ngi kyrshan kin hap ban ïatynjuh bor ha madan. Katno ngi kmen lang lada ka Ri kaba ngi kyrshan ka jop bad katno ka kthang lada ka shah rem noh. Ynda ka Ri kaba ngi kyrshan tyngeh kam poi sha ka thong, ngi da diaw haduh katta-katta. Don lei ki bym sngewkwah shuh tang ban bam ban dih namar ba la jur palat ka jingsngewsih. Sngew kumba la shah pynrem lang! Ka jingieid ka pynlong ïa ki briew ba kin long ha kata ka dur.
Ka jingdon jong ki kor ki bor ka la nang pynsngewthuh bad ai jingtip kham bniah ïa ki paidbah shaphang ka jingïalehkai phutbol. Mynta, wat ki khynnah rit ruh ki tip uei udei uei bad u ïalehkai na ka klob ne ka Ri aïu. Teng-teng kiba la heh la san ki dang hap shah hikai ha ki khynnah ban tip ïa ka kyrteng u nongïalehkai, ka klob bad ka Ri jong u. Ka jingïaid ïew ka English Premier League, Spanish La Liga, German Bundesliga kam dei kaba kai. Ha kine ki lympung, ki don ki nongïalehkai kiba remdor haduh katta-katta, bad mynta ki la leit phai shwa sha la ki jong ki Ri ban pynkhreh na ka bynta ka World Cup. Kane ka tamasa ba shisien saw snem ka long kawei na kiba shongshit tam na ka bynta kiba bun ha kane ka sla pyrthei. Ngin ïa khmih mano kita ki ban long ki lahduh bad mano ki ban hap mad ïa ka jingshah rem.
