Shillong, Jylliew 11
U Symbud Myntri Rang-bah ka Sorkar Jylla u Bah Sniawbhalang Dhar uba dei peit ïa ka tnad Transport, u la pyllait paidbah ïa ka skhim One Time Settlement (OTS) 2026 jong ka tnad Transport ka ban ai jingïarap ïa ki trai kali kamai bad ki bym lah shuh ban siew ïa ki khajna kali jong ki da ki snem.
Haba kren sha ki nongthoh khubor hadien ka jingpyllait paidbah, u Bah Sniawbhalang u la ong ba ïa kane ka skhim la mynjur da ka kynhun Myntri ka Sorkar Jylla dang ha kine ki sngi kiba la dep bad lyngba kane ka skhim, ka Sorkar kan map noh haduh 90% ka kuna bad 80% ka khajna (MV tax/Goods & Passenger tax) bad kane kan pynsting ïa ki jingeh jong ki trai kali kamai.
U Bah Sniawbha u la pyntip ba kane ka skhim kan sdang ban treikam naduh ka sngi ba la pyllait paidbah ïa ka bad u la kyntu ruh ïa ki paidbah ba ki lah ban sdang leit siew noh ïa ki kuna bad ki khajna kali jong ki.
Shuh-shuh u la pyntip ba ka Sorkar ka la ai por ïa ki trai kali kamai ba kin siew ïa ki kuna bad ki khajna kali jong ki lyngba ka OTS tang hapoh jong ka 31 tarik Nailar 2026, ha kajuh ka por u Myntri u la kyntu ruh ïa ki trai kali ba ki dei ban siew khuid noh naduh mynta shaduh ki snem ban sa dang wan.
Nalor kata u la ïathuh ba na kane ka jingmap ka Sorkar ïa ki kuna bad ki khajna jong ki kali kamai ka Sorkar kan ïoh sa tang kumba T.120 haduh T.150 klur na ka T.900 Klur ka khajna ba ka dei ban ïoh na ki kali.
Ha ka jingïalang pyllait paidbah ïa ka skhim One Time Settlement (OST) kaba la long ha Secretariat nalor u Symbud Myntri Rangbah u Bah Sniawbhalang Dhar la ïadonlang u Commissioner and Secretary jong ka Transport u Sanjay Goyal IAS, ki ophisar, ki District Transport ba na ki district bapher-bapher lem bad kiwei-kiwei.
