Shillong, Jylliew 11
U Bah Marshal Biam uba dei u President ka Jaiñtia Coal Owners, Miners, Suppliers and Workers Association (JCOMSWA) u la rai ban nym sangeh shah thngan bad ïa kane u la pynpaw ruh hakhmat jong ki ar ngut ki MLA ka East Jaiñtia haba ki wan ban ïakynduh ïa u ha ka sngi Palei ha Ladrymbai Dongwah.
Kine ki ar ngut ki MLA ki long u Bah Kyrmen Shylla, u MLA ka UDP na Khliehriat konstitwensi bad ka Kong Santa Mary Shylla ka MLA ka NPP na Sutnga Saipung konstitwensi.
U Bah Kyrmen Shylla u la ong ba ïa ka dorkhast jong ka seng u kular ban pynpoi hakhmat jong u Myntri Rangbah ka Jylla u Conrad K Sangma ynda u la wanphai na Delhi.
U la pynpaw ka jingsngewkhia ïa ka jingshah thngan jong u Bah Marshal kaba la ïaid mynta la khadwei sngi namar kan sa ktah ïa ka koit ka khiah bad khamtam lei ba u Conrad un sa wanphai na Delhi haduh ka 15 tarik mynta u bnai.
U Bah Kyrmen u la ong ba lada ïa kane ka jingdawa jong ki paidbah ka Sorkar kam sngap, u kloi ban ïatreilang bad ki paidbah ban mih sha madan ban ïakhih lang na bynta ka jingmyntoi jong ki paidbah.
Na ka liang u Bah Marshal uba la ai jingkren haba u shong shah thngan u la ong, ba un nym sangeh ban shah thngan katba ka Sorkar kam pat pyllait ban shah tih dewïong namar ki paidbah ki la mad shibun ki jingeh naduh ba la khang ïa ka jingtih dewïong.
Kumban shu pynkynmaw, ka jingshong shah thngan jong u Bah Marshal ka la sdang naduh ka 1 tarik mynta u bnai kaba la ïaid mynta la khadwei sngi kaba la ktah ïa ka koit ka khiah ka jong u.
Kane ka jingshong shah thngan jong u, ka long ban dawa na ka Sorkar ba kan plie noh ban tih dewïong ban ailad ïa ki riew paidbah ban ïoh tih dewïong ym ban ailad tang ïa kiba heh ba hain ba kin im tang ma ki.
