Shillong, Jylliew 11
Ka North East Students Organisation (NESO) ka la pynrem jur halor ka jingshah pynïap ïa ki hynriew ngut ki shynrang Naga kiba dei na Konsakhul ka shnong ki Naga ha Manipur, ïa kaba la lap ïa ki dkhot met jong ki ha ka 10 tarik u Jylliew 2026, jan shibnai hadien ba ki la shah rahbor na shnong Leilom Vaiphei, kaba la jia ha ka 13 tarik u Jymmang 2026.
Ha ka kyrwoh ba la phah ha ka sngi Palei jong ka taïew, ka NESO kaba dei ka synjuk ba hakhlieh duh jong ki phra tylli ki seng samla pule na kylleng ki Jylla ka Thaiñ Shatei Lam Mihngi, ba kynthup ïa ka AASU, KSU, GSU, AAPSU, NSF, AMSU, MZP bad TSF, ka la ong ba ka jingsngew shyrkhei shikatdei eh, ïa ki khubor ba kine ki lanot ki la shah pynshitom beiñ hashuwa ba kin shah pynïap bad shah ot dkhot met.
“Kane ka rukom leh ba tohmet, ka pyni ïa ka jingbym don shuh ka jingïatip para briew bad ba kane ka jingjia ka la pynkyndit ïa ka jingsngew jong ka thaiñ baroh kawei, kaba long kum ka jingpynkynmaw ïa ka jingnang sniew ka jinglong jingman ha Manipur,” la ong ka NESO.
Haba pynpaw ïa ka jingsngewlem sha ki longïing ba shem ïa kane ka apot bad ki briew jong ka Konsakhul Naga, ka NESO ka ong, ba ka ïeng ha syndah bad kito kiba la shah knieh jynthet ïa la ki baieid bathoiñ ha kane ka kam kaba shyrkhei bad ba khlem ka jingpyrkhat para briew.
Ka NESO ka dawa ïa ka jingtohkit mardor, kaba shai bad ka bym shah liang halor kane ka kam bymman ba shyrkhei, bad ong ba man ki briew kiba donkti, kampher ïa ka jingdon jingïadei badno-badno ne don kyrdan, dei ban ithuh, kem bad pynshitom bad ban bishar hok khlem ka jingpynslem.
Namarkata, ka NESO ka la maham ba ka jingbym leh ei-ei kan nang pynshlur shuh-shuh ïa kine ki briew ba kin leh ïa kum kane ka kam, khlem ka jingsheptieng ïa ki jingpynshitom.
Ka NESO ka la pynpaw ruh ba ha kine ki lai snem ba la leit, ka la ïai ïalap halor ka jingsuk, ka jingïakren sngewthuh bad ka jingïa suk ha Manipur bad ïai kyrpad ïa baroh ki kynhun ba don bynta bad ki bor khmih, ba kin ïada ïa ki nongshong shnong bad ban shim ïa ki sienjam kiba khlaiñ ban pynkut ïa ka jingïa umsnam mar kylliang.
Wat hapdeng kine ki jingkyrpad bad ka jingbuh ïa hajar ngut ki bor pahara ka Sorkar Pdeng, ka Seng ka ong, ba ka jinglong jingman ka dang ïai sniew shuh-shuh.
Haba buh jingkylli ïa ka Sorkar India, ka NESO ka la kylli, ba kumno ka lah ban long ba hadien palat lai snem jong ka jingïakynad bad ka jingbuh bun ki bor pahara, ym pat don u wei ruh u nongshah kynnoh ha kine ki jingpynïap briew bym lah ban ñiew shuh, ki jingrahbor, jingthang ïing.
Ka NESO ka la pynpaw ruh ïa ka jingsngewkhia kaba jur halor ka jingkynnoh ba shah liang ki bor ka Sorkar Pdeng, haba pynpaw ba kino-kino ki jingïadon bynta lang ban leh ïa ki kam bymman, ka jingkheiñ sting, ka jingïasuhbuit lane leh shiliang da ki bor pahara, ba la bynshet ban pynneh ïa ka suk ka saiñ bad ïada ïa ki nongshong shnong, kadei ka jingshet kylla kaba shyrkhei ïa ka jingshaniah u paidbah bad kadei ban ngat ha ki jingpynshitom katkum ka aiñ.
Ka NESO ka ban biang ba ka jingsuk kaba neh ha Manipur, ka lah ban wan tang lyngba ka jingbishar hok, ka jingtynrong ïa ka jingkitkhlieh bad ka jingai jingïada ba mar katjuh ïa baroh ki jaidbynriew.
Ka la dawa ïa ka Sorkar India, ban shim ïa ki sienjam kiba shai, ha ka ban wanrah pat ïa ka jingshaniah u paidbah, pynthikna ïa ka jingshngaiñ jong baroh ki nongshong shnong bad ban pynkut noh ïa ka dustur ban shu map, kaba ai ding ïa ki kam umsnam.
