Shillong, Jylliew 11
U kyrtong ka Sorkar synroplang lang ka Meghalaya Democratic Alliance (MDA) II uba dei ruh u National Vice President ka National People’s Party (NPP) u James K Sangma, u la shah jied khlem ka jingïaleh pyrshah kum u Member of Parliament (MP) ka Jylla sha Rajya Sabha.
Ïa ka jingpynthikna ba shah jied kum u MP Rajya Sabha, la shim ha ka sngi ba kut noh ka por weng kyrteng ïa ki kyrtong.
Haba kren sha ki lad pathai khubor, u James Sangma u la ong “Hadien ka jingkhang noh ïa ka jingweng kyrteng ha ka por 3 baje janmiet mynta ka sngi, nga la ïakynduh ïa u Returning Officer bad ïoh pdiang ïa ka syrnod (certificate) jong ka ilekshon”.
Haba shim kum ka jingkitkhlieh kaba heh bha, u la ong ba un mihkhmat ïa ka Jylla da ka jingaiti lut.
U James u la pynpaw ka jingsngewkmen bad ha kajuh ka por u sngew burom ban kit ïa kane ka jingkitkhlieh. Nga tip ba kadei ka jingkit kaba khia bha ban mihkhmat ïa ka Jylla ha ka Upper House bad haba tip bha ïa ka kamram jong nga, nga kwah ban tynrong ïa kane ka jingkitkhlieh da ka jingaiti lut bad jingleh hok.
Halor ki jingeh ban mihkhmat ïa ka thaiñ Shatei Lam Mihngi ha Parliament, u James u la ong ba ka jingduna paid, ka buh ha ka jingeh ban ïoh bha ïa ka por ban kren, hynrei un ïaleh katba lah ban ïoh ïa ka por ba donkam.
U James u la buh thup ïa ki kam ba un leh hakhmat eh, ba kynthup ïa ka jingpynrung ïa ka ktien Khasi bad Garo hapoh ka Khyrnit ba phra ka Riti Synshar ka ri bad ka jingpyntreikam ïa ka Inner Line Permit (ILP) nalor kiwei-kiwei.
“Na ka liang ka Meghalaya ngi ïatip baroh, ba ngi la kyntur bha ban pynrung ïa ka ktien Khasi bad Garo ha ka Khyrnit ba phra. Ki don bun ki mat kiba ka Meghalaya ka don haba phai sha ka sur ba ngi kwah ban pynsngew ha Parliament, hynrei hooid, ki don ki mat ha ka Thaiñ Shatei Lam Mihngi ruh, kiba donkam ban hap kren” u la ong.
“Halor ka ILP, ngi ïa tip baroh ba kane ka dei ka mat kaba la mynjur hapoh ka Ïingdorbar Thaw Aiñ ka Jylla kum ka ‘resolution’, kumta kadei ka kamram jong nga kum u nongmihkhmat ka Jylla, ban pyntyllun shakhmat ïa kane ka ‘resolution’, khnang ba kan ïoh ïa ka sur ha ki saw kynroh ka Rajya Sabha. Hooid, Ngan buddien bha ïa kane ka kam” la ong u James.
U la pynpaw ruh ba un ïarap katba lah ha ka jingpyntreikam ïa ki skhim ka Sorkar Pdeng hapoh ka Jylla. “Ka kamram jong nga kum u Member of Parliament, nga lah ban shim ruh ïa ka bynta kum u briew ban buddien ha New Delhi ïa ki skhim ka Sorkar Pdeng, ki prokram ka Sorkar ha ki tnad bapher-bapher”.
