Shillong, Jylliew 11
Da ka jingsngewsih kaba khraw bad ka mynsiem kaba sngewkhia, ka Shillong Christian Youth Organisation and Conference (SCYOC) ka pynpaw ïa ka jingsngewsih bad ka jingpyrshah jur halor ka jingjia kaba sngewsih ha kaba la pynïap ïa lai ngut ki Pastor ha Manipur kiba dei na ka Thadou Baptist Association India (TBAI) Kangpokpi District, Manipur, ha ka 13 tarik Jymmang, 2026.
Kane ka jingjia ka la pynkyndit bad pynsngewsih ïa bun ngut ki briew bad ki kynhun paidbah ha kylleng ka ri bad ka long ka jingpynkheiñ ïa ka hok jong ka jingim briew, ka jingsuk bad ka jinglaitluid ha ka jingngeit niam. Ka jingduh noh ïa kine ki shakri U Blei kiba la aiti lut ïa la ka jingim ha ka jingshakri, jong ka jinglehisynei, ban tei pat ïa ka imlang sahlang lyngba ka jingngeit, ka long ka jingduhnong kaba khraw ym tang ïa ki longïing jong ki hynrei ïa ka imlang sahlang hi baroh kawei.
“Ngi phah ïa ka jingsngewlem kaba khraw sha ki bahaïing bahasem jong kiba la khlad noh bad ngi duwai ba U Blei un ai ïa ka jingsuk, ka jingpyntngen kum ha kine ki por kiba eh bad kiba dap da ka jingsngewsih. Ngi ïeng lang ruh ha ka jingïatylli bad baroh kiba la shah ktah ha kane ka jingjia kaba sngewsih ha ka jylla Manipur,” ong ka kyrwoh khubor ba la pyllait da u Bah Wanboklang Thangkhiew, General Secretary ka SCYOC.
Ka SCYOC ka kyntu ïa ki bor ba dei peit ba kin leh ïa ka jingtohkit kaba hok, kaba khuid bad kaba lait na kino-kino ki jingpynbor, bad ban pynïoh ïa ka hok ïa kiba shah ktah. Ka jingïada ïa ka jingim briew bad ïa ka hok jong ka jinglaitluid ha ka jingmane Blei ka dei ka kamram kaba kongsan tam jong kano-kano ka synshar paidbah.
“Kum ha kane ka por kaba khia eh, ngi kyrpad ïa baroh ki kynhun bad ki jaitbynriew ba kin kyntait ïa ka jingïakynad bad ka jingbishni, hynrei ban trei lang na ka bynta ban wanrah pat ïa ka jingsuk, ka jingïaishah bad ka jingïalong kawei. To ngin pyndonkam ïa kane ka jingjia kaba sngewsih kum ka jingpynshlur bad ka jinghikai ban tei pat ïa ka imlang sahlang kaba burom ïa ka jingim briew bad ka hok jong uwei pa uwei,” la ong u Bah Wanboklang.
