Shillong, Jylliew 12:
Ka Jaintia Coal Owners Miners Suppliers and Workers Association (JCOMSWA) lyngba u Information Secretary Bah Overcome Dkhar ka la pynrem jur ïa ki bor pynïaid ka East Jaiñtia Hills District bad ïa ka DMHO namar ka jingleh torti jong ki ba ha kine ki ar sngi ki la phah da ki doktor mrad ban peit bniah ïa ka koit ka khiah u President Bah Marshal Biam.
Ka seng ka la kynnoh ba ka jingleh torti jong ka, la pynishai ba ki la kwah ban pynïap ïa u President naduh hynnin ka sngi ka 11 tarik Jylliew 2026 namar ki la phah da u doktor ba peit ïa ka Saipung u Dr. Sutong bad mynta ka sngi ka 12 Jylliew 2026 ki la phah da u doktor ba peit ha Rymbai u Dr. Langstang.
U la ong lada ki bor pynïaid District kim lah ban phah da ki doktor briew kiba shisha, kum ka Association ka pynpaw ka jingsngewsih ïaka jingleh jong ki.
Ka seng ka la kynnoh ba katba u President u dang shah thngan na ka bynta ka jaitbynriew kim kheiñ shuh ïa u kum u briew ki kheiñ tang kum u mrad .
U la ong biang lada ki dang bteng kumne, ka Association kan phah jingthoh sha ka Human Rights Commission.
U Bah Marshal u la shah thngan mynta la 12 sngi ban dawa na ka Sorkar ban plie noh ïa u dewïong uba la khang mynta la 12 snem.
