Shillong, Jylliew 12
U Myntri ba khmih ïa ka tnad Pule Puthi ka Jylla u Bah Lahkmen Rymbui u la ong ba ka Meghalaya kam lah ban shu sah shadien ha ka juk jong ka Artificial Intelligence (AI) hynrei ban pynbeit ïa ka rukom ai jinghikai bad pynpaw ïa ka jingduna ki nonghikai kiba la pyntbit kum u mawjynthud ban pynïaid shakhmat ïa ka jingpule AI.
Haba kren bad ki lad pathai khubor ha ka sngi Ba-ar, u Myntri u la ong, ka Jylla ka dang peit ban wanrah ïa ka jingkylla hynrei ka jingïaid shakhmat kan shong pat ha ka jingïatreilang bad ki kynhun halor ki kor teknoloji.
“Ngi hap ban ïa beh bad ym tang ban shu kem hynrei ngi hap ban ïaid bad kane ka juk kaba mynta ne ka rukom kaba thymmai ha ka jingai jinghikai. Dei halor kane ba ngi dang pyrshang ban wanrah ïa ka jingkylla, ka jingkylla ha kata ka rukom ïa kaba donkam ban leh. Hynrei haba nga ong kumtei, ka long kaba suk ban shu kren ban ïa kaba leh namar ba ngi donkam ban ïatreilang bad kino-kino ki paralok. Mynta lada phi ong ba ka AI ban pynïar ha baroh ki skul kumta ka jingkylli kaba mih ka long mano ban hikai ïa katei ka sobjek lada ngi kynthup ïa ka ha ka Curriculum? Ngi hap ban pyndonkam ïa ki teknoloji,” la ong u Myntri.
U la pynpaw ïa ka jingkongsan ban pyndonkam ïa ki kor teknoloji ka dei ka lynti, watla ki tiar ki lah ban long ki ban treikam tang shipor.
Shuh shuh u Myntri u la ong, “Ngim lah ban thung ïa ki nonghikai AI ne AI Professor, hynrei ngi hap ban pyndonkam ïa ki teknoloji katba don ïa ki kor teknoloji, ki lah ban long ki bym treikam shuh ha ki 10-15 snem. Hynrei ngi hap ban ïaid shakhmat”.
U la bynrap ba ka Sorkar Pdeng ka dang ïaleh ban pynbor ban pynïar ïa ka jingpule ha ki teknoloji kiba thymmai bad ka lynti ïaid jong ka Meghalaya kan long kaba shai kdar ha ki por ki ban wan.
