Shillong, Jylliew 12
U Symbud Myntri Rangbah ba dei peit ïa kam Pynroi Sor, u Bah Sniawbhalang Dhar u la ong ba ïa ka ‘Shopping Mall’ ha Khyndailad la jan dep bad ka Sorkar kan sa pynmih ïa ka ‘Expression of Interest’ tang mar sien dep ïoh ïa ka kaiphod ba khatduh.
Haba kren sha ki nongthoh khubor u la kren ruh haba ïadei ka projek ka Polo Mall kaba dang sahteng haduh mynta, u la ong ba ki nongshim wai ki kwah ha ka dor kaba duna, wat haba la pynmih bunsien ïa ka jingpynbna.
“Ngi la pynbna paidbah la 2 ne 3 sien, hynrei ym don uwei ruh uba wan shakhmat. Kumta sa shisien ngin ïakren halor kane bad ngi hap ban pynduna ïa ka dor khyndiat. Kane ka dei kaba mynta shipor bad yn sa peit ha ki por ban sa wan” u la ong.
Haba ïadei ka New Shillong Township u Bah Sniawbhalang u la pynpaw ïa ka jingkyrmen bad u la ong ba ki jingpyntrei bapher-bapher ki la ïaid shaid-shaid. “Ka kam la nang ïaid shakhmat ha ka rukom kaba bit ba biang. Katto katne ki dei ki projek ka Urban Affairs bad ka Tourism. Baroh ki projek ki la ïaid shaid-shaid ha ka jingtreikam ha kylleng ka New Shillong Township” u la ong.
