Shillong, Jylliew 12:
U Bah Wailadmiki Shylla uba dei u Myntri ka tnad ka koit ka khiah u la ïathuh ba ka Sorkar Jylla ka dang ap ïa ka tarik na u Myntri Rangbahduh ka Ri u Narendra Modi na ka bynta ban plie ïa ka Shillong Medical College. U la ïathuh ba ki jingtei jong ka Tura Medical College ka la ïaid kumba 95%.
Haba kren bad ki nongthoh khubor, u Bah Wailad u la ong ba ki jingpyrshang ba mynshwa ban pynbeit ïa ka tarik pynskhem la hap ban pynsangeh noh namar ka jingïatyngkhuh bun ki kam.
“Ngi la dep buh tarik arsien kham mynshwa hynrei hadien ka la mih da kumwei pat, kumta ngi la hap ban pynsangeh noh,” u la ong ha ki nongthoh khubor.
U Myntri u la bynrap ba ka Sorkar Jylla ka dang ïakynduh bad ka ophis jong u Myntri Rangbahduh ka ri.
“Wat mynta ngi dang ïakren bad ngi dang ap ïa ka tarik na u Myntri Rangbahduh, ha ka sien kaba la dep nga la pynkynmaw ïa u Myntri ka koit ka khiah ka Sorkar Pdeng ha ka por ba plie ïa ka ARHI Hospital ba ngi dang ap ïa ka tarik bad ka por na u Myntri Rangbahduh,” ong u Bah Wailad.
U la pynpaw ka jingkyrmen ba yn sa buh noh ïa ka tarik kaba khatduh. “Nga kyrmen ba shen ngin sa lah ban pynbeit bad pynkut noh ïa ka tarik ban pynbna paidbah,”u la pynpaw.
Halor ka kyrdan jong ka Tura Medical College, u Bah Wailad u la ong ba ka jingtei ka la jan dep. “Ka jingtei ka la jan dep 95% lada ngi kren shaphang ka bynta jong ka jingtei.”
Ha ka liang ka jingpynrung kam u la ong, “Ngi la dep ban pynïaid shakhmat ïa ki jingpynbna na ka bynta ki kam nonghikai.”
