Shillong, Jylliew 12
Ka Khasi Students’ Union NEHU Unit ha ka Sngi Thohdieng ka la pynlong ïa ka jingai khublei khatduh bad ai kitbok kitrwiang ïa ki palat spah ngut ki samla pule jong ka skulbah shuwa ba kin mih noh na katei ka shlem pule.
Ha kane ka Khasi General Farewell Meet 2026 ba la pynlong ha Multi-Used Convention Hall, ka KSU ka la pynlong ïa katei ka jingkynduh lang halor ka phang pdeng “To ïai pyrta bad pynsawa, u Mawlynnai phi don mynta, to buh ïa ka nuksa ba la ïalam, shaphrang to ïaid jabieng to lam”
Ha kane ka sngi la wan ban ïa shimbynta u samla Lambokstarwell Marngar President ba dang shu shong thait ka KSU uba la long kum u kongsan, katba u Bah Paul Lyngdoh uba long ruh u President barim ka KSU bad uba long mynta u MLA ka West Shillong u la long kum u Symbud Kongsan.
Haba kren kum u kongsan u Bah Lambokstarwell Marngar u la ong ba shibun ki khraw pyrkhat ki proh jabieng jong ka jaitbynriew Khasi, hynrei duna kita kiba pynjanai ïalade ban kynjoh sha ka thong. U la ong ïa ki samla ba haba ki la pyndep ïa ki jingpule bad mih noh na ka skulbah, ba kin kynmaw ba kin don ka mynsiem noh synñiang sha ka imlang sahlang bad sha ka Jaitbynriew.
Shuh-shuh u Samla Lambokstarwell u la ong, “Kam biang ïa ki samla ban ïakhun tang da ka bor met, hynrei donkam ban ïakhun ruh da ka bor jabieng bad ka jingstad.”
U Bah Paul Lyngdoh haba kren kum u Symbud Kongsan u la pynphalang jingmut ïa ki samla ba kin long kum ki kot kudi kiba her hajrong bad kham shajrong bad ba kin wanphai biang kum ka kot kudi sha tbian. Kane ka jingkren jong u Bah Paul ïa ki samla ka thew ba ki dei ban wad ïa ki jingstad ba kham shajrong hynrei haba ki la don ka jingnang jingstad kaba ïar ba kin ym klet ïa ka jaitbynriew bad ba kin ai ka jingshakri kum kiba la stad ïa ka ri bad ka jaitbynriew.
Ha kane ka jingïalang nalor u Kongsan, u Symbud Kongsan la don ryngkat ki nongïalam ka NEHUSU, ki nongïalam KSU barim, ki nongïalam KSU NEHU unit bad ki spah ngut ki samla pule.
La pynshongshit shong shngaiñ ïa ka jingïakynduhlang da ki jingrwai jingshad ba la ai da ki samla pule ba na ki tnad pule bapher-bapher bad la sam Momento bad pynkupburom sha ki palat 600 ngut tam ki samla pule jong katei ka skulbah.
