Shillong, Jylliew 14
Ka Pule puthi ka dei kawei na kiba donkam tam ha kane ka juk ba mynta, ka jingnang jingstad ka long ha khmat eh lada ïa nujor bad kiwei. U MLA bad MDC barim ka Nongkrem Constituency u Bah Lambor Malngiang ha ka sngi Saitjaiñ u la plie ïa ki kamra klas bathymmai jong ka Salem Higher Secondary School kaba u la pynïoh lyngba ka Chief Minister Spacial Development Fund 2024-25.
Haba kren ha kane ka sngi na ka liang u Bah Lambor u la pynpaw ba ka Salem Higher Secondary School ka long kum ka bynta jong ka ïing ka sem jong u, ka jingïajan naduh ki por ba mynshuwa bad kaba dang bteng haduh kine ki sngi.
U la ong ruh ba ka pule puthi ka dei kawei na kiba donkam tam ha kane ka juk, u la ïaroh ruh ïa ka sap ka phong ba ki khynnah skul ki don ka sap la ka dei ha ka rwai ka siaw ne kiwei ki bynta. U la kyntu ïa ka skul ban ai da ka jingthoh ba un ïoh ban phah sha u Myntri Rangbah ka Jylla u Conrad Sangma ban pynmang pisa na ka bynta ki jingdonkam ka skul haba ïadei ka put ka tem.
U la bynrap ruh da kaba ong ba ki kmie ki kpa jong ka thaiñ ki shaniah bha ïa kane ka skul, na kata ka daw ki phah pule ïa ki khun jong ki, kane ka skul ka don ïa kata ka jinglah jong ka wat ban ïanujor bad ki skul kiba don ha nongbah Shillong.
U la ai ka jingïaroh ïa u Myntri Rangbah ka Jylla uba la phai khmat bha ha ka pule puthi bad pyrshang ban kyntiew ruh ïa ka sap ki khynnah pule lyngba ka put ka tem kaba u la bhah kyrpang. U la kitbok kitrwiang ïa baroh ki khynnah kiba la shah pynkupburom ha kane ka sngi bad kiba la pass bha ïa ka eksamin HSSLC bad SSLC.
Ha kane ka sngi u Bah Lambor u la pynkup burom kyrpang da ka (L) Helimaya Kharrngi Special Award na ka bynta i ba wan ba nyngkong duh jong katei ka skul, kata i Ishahaphi Nongpluh ha ka kyrdan pule SSLC kumjuh ruh ïa baroh ki khynnah kiba la pass bha bad ïoh ‘Distinction’ ha ki sobjek bapher-bapher.
