Shillong, Jylliew 14
U samla Rangbah Andreas Marweiñ uba dei u President ka Meghalaya Blood Donor Organisation (MBDO) u la pynpaw ba u la dep ban ai snam haduh 54 sien bad u la pynshlur ïa ki para samla ba kin long kiba kylluid mynsiem ban ai snam.
Ïa kane u la pynpaw haba ai jingkren ha ka jingïalang ba la long ha ophis ka Federation of Khasi Jaintia and Garo People’s ha ka Sngi Saitjaiñ, nabynta ban pynkup burom ïa ki samla ba ju ai snam sha kiba donkam snam kyrkieh.
Ka pyrthei salonsar ka ju rakhe ïa ka sngi synniang snam lane ka World Blood Donor Day ha ka 14 tarik u Jylliew bad FKJGP ka la ïoh ban pynkup burom ïa ki 16 ngut ki khun samla kiba la ju ai snam palat ïa ka 10 sien.
U Samla Andreas u la ong, “Ka snam ka long ka jingim, ka shi unit ka snam ba ngi ai ka lah ban pynim haduh lai ngut ki mynsiem briew bad lada ngi ai snam lai unit ka mut ngi la pyllait im 15 ngut ki mynsiem briew.”
U la ai ka jingïaroh ïa u nongïalam ba ha khlieh duh ka FKJGP, u Bah Dundee Cliff Khongsit uba la shim ïa ka bynta ban ai snam bad ban pyni nuksa sha kiwei, “Lada dalade ngi ai snam, ngi sngewskhem ban pynshlur ïa kiwei ruh ban ai snam” u la ong.
Shuh-shuh u la ong ka jingai snam ym tang ba ka pynim ïa kiwei ki mynsiem briew, hynrei ka pynlong ruh ïa ka met jong u nongai snam ban koit ban khiah, namar kata u la pynshlur ïa kiwei ba kim dei ban artatien ban ai snam.
U la pynshai khambha haba ïadei ka jingpynshlur jong u ïa kiwei ban ai snam, namar ka kynhun MBDO ka donkam ka jingïatreilang namar tang ka kynhun kan ymlah ban ïarap ïa baroh bad dei na kata ka daw u la khot bad pynshlur ïa kiwei ruh ba kin long kiba kylluid mynsiem ban ai snam.
Haba ai jingkren na ka liang u Bah Dandee Clip Khongsit u la bynrap ïa ka jingong u Samla Andreas ba, kiba bun ki don ka jingtieng bad jingartatin ban ai snam wat haba donkam snam kiba ha ïing ha sem lajong, ka daw jong kane ka long ba ki tieng ban ai snam, na kata ka daw donkam ka jingai jinghikai bad ka jingpynshlur ba kin ai snam.
