Nongstoiñ, Jylliew 13
Ha ka sngi Saitjaiñ jong ka taïew ki paidbah nongshong shnong na ki shnong bapher bapher jong ka thaiñ Ri Mulliang ki la mih paidbah, ban ïashim bynta ha ka rally ban dawa na ka Sorkar ban pynneh pynsah ïa ka Ri Mulliang C&RD Block ha ka shnong Nonglang ha West Khasi Hills.
Ïa kane ka rally bad ka jingïalang paidbah la pynlong ha madan shnong Nonglang kaba la pynïaid da ka Joint Action Committee Ri Mulliang C&RD Block kiba kynthup ïa ki 40 tylli ki shnong.
Shuh shuh ha katei ka sngi la sdang ïa ka rally naduh ka shnong Umwahlang ter ter ha ïew Nonglang bad la ïoh ban pynkut noh pat da ka jingïalang paidbah kaba lyngkot ha madan shnong Nonglang.
Lah ban kdew hangne ba ka jingdawa jong katei ka rally ka long halor ka nongrim ba kumba la thmu naduh nyngkong ha kaba ka Sorkar ka la dep ban buh ruh wat ïa u mawnongrim na ka bynta katei ka block ha ka shnong Nonglang kata ha ka 22 tarik u Naiwieng, 2022, ba dei ban pynneh ïa ka, ym ban rah noh sha ka shnong Tynghor.
Nalor katei ka mat, ka Synjuk ha katei ka jingïalang ka la dawa ruh na ka Sorkar ban pynbeit noh ïa u pud u sam namar kane ka la pynshitom palat ïa u paidbah uba shong ba sah ha katei ka thaiñ khappud bad ka jylla Assam namar la ju shah pyndik na ka por sha ka por.
U Bah Shaprang Lyngdoh, uwei na ki dkhot ka JAC u la ong, “Ngi dap da ka jingkmen ha u snem 2022, ka Sorkar MDA-I kala leh bha shibun ïa ka dong ka thaiñ jong ngi, ha kaba ïa ka Rambrai Konstitwensi kala wan ai ar tylli ki block ha kaba ïa kawei yn buh ha Rambrai bad kawei ha Nonglang, ha kaba ngi la ïa khohreh ban wat ki jaka, bad ka long kaba shisha ïa ka shnong Tynghor ym shym la phoh sniew ha kito ki sngi hynrei la wat jaka ha ki ar tylli ki jaka ha Nonglang bad ha Langja bad ngi sngew burom ïa ka Sorkar ba kala rai ban buh ïa u mawnongrim ha ka shnong Nonglang.”
U Bah Shaprang u la ong ruh ba, kaba sngew lyngngoh ka long ba kane ka Sorkar MDA-II kaba mynta, da ki nongïalam ba rangbah jong ka, u Symbud Myntri Rangbah Bah Prestone Tynsong ha ka jingïalang ïalap ilekshon ha Rambrai u la pynpaw ba ïa ka Block ha ki thaiñ Ri Mulliang yn buh ha Tynghor kaba lyngngoh ka long u juh u briew uba ai u juh u briew uba shim.
Shuh shuh u la ong, “U MLA jong ka thaiñ u RG Momin, ha ki jingshisha ngi jied ïa uta u nongmihkhmat jong ka konstitwensi na ka bynta kaba ma u, un wanrah ïa ki kam pynroi ha ka dong ka thaiñ bad ka konstitwensi hi baroh kawei, hynrei une u MLA uba biej u jong ngi ïa kaba la don u dang kwah pharia, ha ka jingshisha lada u dei uba stad u dei ban wanrah sa lai bad saw tylli ki C&RD Block hynrei balei u shim noh ïa ka Block na Nonglang.”
“Nga don ruh ïa ka jingpynshisha balei nga kynnoh ïa une u MLA, ka daw ka long wat ha kane ka taïew bala pynbeit ban pynlong ïa kane ka rally, ngi la kynjoh ktien ïa u MLA jong ngi, hynrei u ong ba ngam don hok ngam donkti eiei, u leh kum u pilat hynrei to tip, lada ma u um soi ïa ka kot ym don uba nud ban ktah,” ong u Bah Shaprang.
Ha katei ka sngi ki nongkren ki kynthup ruh ïa u Bah Johnes Sohshang, Secretary Hima Nongmynsaw, Bah Ailan Lyngdoh Nonglait, Sordar ka shnong Nonglang, Kong Sentilin Shangdiar Women Organisation, Isnine Nongdoh na ka JAC, Bah Shaphrang Lyngdoh, Bah KD Syiemlieh Secretary ka shnong Nonglang bad kiwei kiwei.
