Shillong, Jylliew 14
Ka jingïap ki ar ngut ki shijur ha kawei ka dukan die waidong harud surok bah kaba don hajan ka jingkieng Nongthymmai kaba hap hapoh ka shnong Lumsohphoh ka la pynsuba sniew namar kine ar ngut ki la thiah ïap ryngkat u tyllai phasi.
Katkum ka dur ba la ïoh shon, kine kiba ïap, kawei ka dei ka metïap jong u shynrang uba la tap da ka jaiñ ïa ka durkhmat bad kawei ka metïap dei jong ka kynthei kaba la phai kynriang kaba ki la shong ha madan.
Ïa kine ki ar tylli ki metïap la lap ha ka sngi U Blei kaba dei ka 14 tarik Jylliew 2026 ha ka por 6:00 baje mynstep da u khun jong u trai dukan uba la mut leit bylla noh bad mar mar u la khot ïa ka kmie bad u kpa ban wan peit ïa kine ki ar tylli ki metïap.
Na ka liang u kpa bad ka kmie ki la pyntip noh mar mar sha u Rangbah Shnong Lumsohphoh bad pyntip sha ki pulit ka thanad Laitumkhrah.
Katkum ka jingïathuh ki pulit, kine ar ngut ki dei na ka jaidbynriew Hajong ha kaba u shynrang la tip kyrteng u Simanta Hajong uba dei na Ranikor bad ïa ka kynthei kaba la tip kyrteng ka Pronomi Hajong ym pat lah ban tip ka dei naei ka shnong.
Na ka liang ki pulit ruh ki dang pynlong ka jingtohkit ïa ka jingïap jong kine ki ar ngut.
Ki pulit ka thanad Laitumkhrah ki la pynkit noh sha NEIGRIHMS Hospital ban leh ïa ka post mortem bad ban pyndep katkum ka jingdonkam jong ka aiñ.
Haba ïakren bad u trai kane ka dukan kwai ba lap ïa ki met ïap u la ïathuh ba ïa kine ki met ïap la lap da u khun jong u ha ka por 6:00 baje mynstep katba u mut ban leit trei hadien kata u la khot ïa ki kmie ki kpa kumta ki la pyntip sha u rangbah shnong bad sha ki pulit.
Na ka liang une u trai dukan u la ïathuh ba um ithuh ïa kine ki arngut.
Haba ïakren bad u Rangbah Shnong Lumsohphoh Bah N. Pakyntein u la ïathuh ba um don jingtip eiei ïa kane ka jingjia lane um ithuh ïa kine ki arngut namar ki dei kiba nabar shnong hynrei u la ïoh jingtip na ki trai dukan kiba la wan pyntip ïa u ha ka por mynstep.
Ka jingkhlad jong kine ki ar ngut kan sa paw pyrthei ynda ki pulit ki la pynlong ka jingtohkit namar la suba ba kine ki ar ngut kiba la ïap, ka lah ban dei ha ka por shiteng synnia hynrei ym lah ban tip la ki shah pynïap ne ki sdien phasi hi namar lada sdien phasi hi bun kiba ïohi kim lah ngeit namar ka jaka kaba rit namar ka dei dukan waidong hynrei ha ka por mynstep kine ar ngut ki la ïap da kaba shong bad ha u ryndang don u tyllai.
