Shillong, Jylliew 15
Ki nongïalam ka Seng Samla Hima Langrin, ki la mih shakhmat ban pynshai paidbah, haba ïadei bad ka jingkam u Bah PS Lyngdoh lyngba ka Youtube jong u, ba u la weng ïa ki dkhot ka Seng Samla, ba kynthup ïa ka Samla P. Mawlieh, General Secretary bad u Samla Blodingwell Langrin, Assistant Secretary.
Haba kren sha ki lad pathai khubor, ka Samla P. Mawlieh ka la ong, ba u Bah PS Lyngdoh u la kam khlem ka nongrim, da kaba ong ba la wengnoh ïa ki nongkitkam ka Seng Samla Hima Langrin.
Ka la ong ruh ba khlem ka jingrai lang ha ka CEC, bad u Bah PS Lyngdoh u la leh marwei bad u khlem ai kano-kano ka jingtip sha ka EC, haba ïadei bad kane ka kam.
Ka la kynnoh ruh ba u Bah PS Lyngdoh, u la kheiñ troiñ ïa ki dkhot ka Seng Samla Hima bad leh marwei bad u la kam nongkynti ruh wat ïa ka Seng Samla Hima Langrin.
Haba ïadei bad ka jingkynnoh ba u ong, ba ki dkhot ka Seng Samla Hima Langrin, dei kiba shong tnum bos, ka Samla P. Mawlieh ka ong “Ngim don bynta ei-ei haba ïadei bad ka politik, hynrei ngi ïeng ha ka nongrim jong ka Hima”.
“Barabor u Bah PS Lyngdoh, u ju leh marwei ïa ki kam, haba u bat kum u President ka Seng Samla Hima Langrin khlem ka jingtip lang da ka EC baroh kawei. Ha kano-kano ka seng, ngi ju burom ïa ka EC, shuwa ban shim ïa kano-kano ka rai ne ka sienjam. Hynrei ka jingleh jong u Bah PS marwei khlem ka jingtip ka EC, ka long kaba u ïuhroit ïa ka bad kheiñ troiñ ïa ki katto katne ki dkhot,” la bynrap ka Samla P. Mawlieh.
Shuh shuh ka ong “Ngi ïeng ha ka nongrim bad ki 1,093 ngut kiba 18 snem shajrong kiba don ryngkat bad ngi ban wengnoh ïa ka ‘management board’ bad ngim shym la pat kynriah haba ïadei bad kane ka nongrim kaba la ïengskhem naduh u snem 2023. Katta snem ngi la ïai ap ïa ka kaiphod tohkit ïa u Nangtei Sing Syiemiong halor ki kam ba u la leh donbor hapoh ka Hima bad ka District Conncil ha u snem 2025 ka la khot ban ai ïa ka jingkynthoh hynrei u Bah PS, um shym la wan bad kyntait ban leit sha District Council.”
Ka Samla P. Mawlieh ka la kynnoh ruh ba ka jingthet kti jong u Bah PS Lyngdoh, kadei lehse ba u la donkti ban kyrshan ïa u Bah Nangtei Sing Syiemiong.
Kumta ka la dawa na ka District Council ban pynlong noh da ka ilekshon jied Syiem thymmai ha ka Hima, khnang ba kan nym don shuh ka jinghuri hura hapoh ka Hima bad ba ki kam kin ïaid beit ïaid ryntih noh.
