Nongstoiñ, Jylliew 15
Ka Synjuk ki Nongsynshar Shnong Nongmynsaw Syiemship kala leit ban ïakynduh ïa ka Deputy Commissioner ka West Khasi Hills, ka Hema Nayak na ka bynta ban pan jingshai halor ka Regional Committee bala thung da ka Sorkar kham mynshwa na ka bynta ban ïakren ïa ki kam ïa pynbeit pud hapdeng ka Meghalaya bad ka Assam.
Lah ban kdew ba ïa ka Regional Committee bala thung da ka Sorkar la khlieh nyngkong da u Bah Renikton L Tongkhar uba dei u Myntri Sorkar bad hadien jong u pat la shimti sa da u Bah Paul Lyngdoh hynrei haduh mynta ka Synjuk ka sah ha ka umdum la katei ka Committee ka dang treikam ne em bad mano bala shimti ïa ka kam kum u Chairman.
Shuh shuh ki nongïalam ka Synjuk ki la pynpaw ka jinglyngngoh kaba jur namar hadien ka jingïakynduh bad ka DC la ïoh jingtip ba na ka liang jong ka DC kam don jingtip eiei la katei ka Committee ïa pynbeit pud ka dang treikam ne em.
Ki la ong ruh ba kane ka jingbym tip jong ka DC kala pynkyndit ïa ki nongïalam ka Synjuk kiba ap khmih lynti ba katei ka committee kan leh eiei na ka bynta ban pyndep noh ïa ki kam ïakajia pud hapoh ka Langpih Sector bad kiwei de ki Sector kiba dang sahteng.
U Secretary ka Synjuk Bah Serbilin Lyngdoh u la ong ba na ka liang jong ka Synjuk kala ju thoh na ka por sha ka por sha ka Sorkar bad sha ki Myntri Sorkar ba ka dei ban pynkloi noh ban ïapynbeit noh ïa u pud u sam jong ki sector ba sahteng bad kane kam dei shuh ka por ban dawa sdang biang ban ïapynbeit pud hynrei kala dei ka por ban dawa pynkut noh shi syndon ïa ki kam kajia pud bad dawa ba ka Sorkar ka dei ban shim ïa ka sienjam ban pyndep noh ïa ka mat ïapynbeit pud.
