Shillong, Jylliew 15
U Myntri Sorkar Pdeng ka tnad Ports, Shipping & Waterways, u Sarbananda Sonowal u la pynpaw ïa ka Meghalaya kum ka nuksa kaba hakhmat eh halor kum-no ki lad pynïasoh, kam jngohkai pyrthei bad ki jing-kylla ha ki rukom synshar ki lah ban kyntiew ïa ka ïoh ka kot ha ka Thaiñ Shatei Lam Mihngi.
Haba kren ha ka jingïalang North-East India Infrastructure Summit and Exhibition 2026, u Sonowal u la ong ba ka Meghalaya ka la “pyndonkam ïa ki jingmyntoi mariang, ka bynta ba ïadei bad ka seng kam seng jam bad ka jaka ba kongsan ban khring ïa ki nongbei tyngka ha kylleng ki bynta kum ka kam jngohkai pyrthei, ka juk stad teknoliji, ka jingpynpoi mar, ka rep ka riang bad ka bording kaba lah ban pynthymmai.”
U la kdew ruh ïa ka jingnang kiew jong ka nam ka burom jong ka Jylla kum ka jaka pdeng na ka bynta ka khaïi-pateng, ki buit thymmai bad ka roi ka par kaba neh – kaba pynpaw ïa ka jingkylla kaba ïar kaba dang ïaid shakhmat ha kylleng ka thaiñ.
Na ka liang u Myntri u la kdew ïa ka jingtreikam bha jong ka Meghalaya ha ka jingsuk ban leh ïa ki kam khaïi, da kaba ong ba ka Jylla ka la ïoh ïa ka kyrdan kaba 3 ha ka ri baroh kawei ha ka ‘Compliance Reduction and Deregulation 1.0’ hadien ba la pyndep ïa baroh 23 tylli ki bynta ba hakhmat eh ban wanrah jingkylla.
Ha kajuh ka por, u la ai khublei ïa ki sienjam ba kongsan kum ka ‘Cherry Blossom Festival’, ki jingbei tyngka ha ki lad ‘digital’ bad ki jingtei ha ka leit ka wan, lem bad ka “jinglong nongïalam ba shitrhem jong u Myntri Rangbah, Conrad Sangma” na ka bynta ban pynskhem ïa ka kyrdan jong ka Meghalaya.
“Ka Meghalaya mynta ka pyni nuksa kumno ka jinglong nongïalam ba ïohi jngai jong u Myntri Rangbahduh, u Narendra Modi, ki jingpynkylla ïa ki polisi bad ki jingbei tyngka ba la thmu ki lah ban plie ïa ki lad kamai, ha kajuh ka por ha ryngkat ka jingpynneh-pynsah ïa ka kolshor bad ka pateng mariang ba kyrpang jong ka thaiñ,” la ong u Sonowal.
Shuh shuh la bynrap ba ka jingpynbha ïa ki lad pynïasoh bad ki lad pynroi ‘digital’ ki ai lad ïa ki nongseng kam seng jam bad pynïasoh ïa ka Meghalaya sha ka ri bad ka pyrthei, kaba pynskhem pat ïa ka bynta jong ka ha ka khana ka roi ka par jong ka Thaiñ Shatei Lam Mihngi.
