Shillong, Jylliew 15
U Myntri Sorkar Pdeng ka tnad Road Transport & Highways, u Nitin Gadkari ha ka Lah Sngi U Blei u la pynbna ïa ki projek surokbah ne ‘National Highway’ ki ban dang wan bad kiba kot haduh T.39,800 klur.
Kine kin kynthup ïa kumba 450 kilomitar ha kylleng ka Jylla, kiba la khmih lynti ba kin pyn-kylla ïa ka jinglong-jingman ha ka liang ki lad pynïasoh ka Jylla bad ban pynsted ruh ïa ka jingkiew ha ka ïoh ka kot.
U Gadkari u la kren ïa kane ha ka jingïalang plie jong ka North East India Infrastructure Summit and Exhibition (NEIINFRA 2026) kaba la long ha Lariti Performing Arts Centre, Shillong.
Ka surokbah ‘4-Lane Greenfield Shillong-Silchar Corridor’, kaba la antad ba ka jinglut kan kot sha ka T.23,000 klur, yn sa wanrah ha ka jingjngai kaba kumba 165 kilomitar bad la khmih lynti ba kan long kum kawei na ki projek jingtei ba kongsan tam ha ka Thaiñ Shatei lam Mihngi.
Kane ka surok kan pynduna ïa ka por ha ka leit ka wan hapdeng ka Shillong bad Silchar da kumba 50% bad kan pynbiang ruh ïa ka jingpynïasoh kaba kham kloi sha Tripura, Mizoram bad Manipur lyngba ka Silchar.
Da kaba pynïasoh ïa ki jaka ba kongsan jong ka ïoh ka kot, ki jaka jngohkai pyrthei bad ki jaka pynpoi mar, la khmih lynti ba kane ka projek kan kyntiew ïa ki kam karkhana, khaïi-pateng, ka kam jngohkai pyrthei bad ka jingbei tyngka ha kylleng ka thaiñ.
Ka jingthmu ban shna ïa ka ‘4-Lane Greenfield Jorabat-Barapani Corridor’, kaba la antad ba ka jinglut kan kot sha ka T.8,500 klur bad kaba jrong kumba 66 kilomitar, kan pynbiang ïa ka lad pynïasoh kaba sted hapdeng ka Guwahati bad Shillong. La khmih lynti ba kane ka projek kan pynduna ïa ka por ha ka leit ka wan hapdeng kine ki ar tylli ki nongbah na kumba 2.5 kynta sha jan shi kynta bad kan long shi bynta jong ka ‘High-speed Siliguri-Guwahati-Shillong-Silchar Economic Corridor’ ka ban sa wan.
U Gadkari u la pynpaw ruh ïa ka jingdonkam ba kongsan jong ka bynta haba ïadei bad ka Darugiri-Baghmara-Dalu jong ka NH-217 ba la tyrwa, ha ka jinglut kaba la antad kumba T.4,000 klur bad kaba jrong kumba 136 kilomitar.
Ka projek kan pynbha shi kat dei ïa ka jingpynïasoh ha Ri-lum Garo bad ki jaka khappud kiba ïajan bad ka Bangladesh, ka ban plie lad na ka bynta ki ïew ki hat, ka koit ka khiah, ka pule-puthi bad ki lad kamai na ka bynta ki nongshong shnong.
Ha kajuh ka por, u la kdew ba ki projek kum ka bynta jong ka Pomlum-Umtyngar jong ka surok ‘Shillong-Dawki Corridor’, ka jingpynbha ïa ka surok Tura-Dalu, ka projek Tura Bypass, ka projek Pynursla Bypass bad ki projek pynïasoh NH-127B kiba ïasoh bad ka jingkieng Dhubri-Phulbari kan nang pynkhlaiñ shuh-shuh ïa ki jingtei jong ka Jylla ha ka leit ka wan kumjuh ban pynbha ïa ka jingpynïasoh haduh ka mer kaba khatduh.
Na ka liang u Gadkari u la pynpaw ïa ka jingkyrmen skhem ba ki projek pynroi kiba dang ïaid shakhmat kin pynkylla dur ïa ki lad pynïasoh jong ka Meghalaya, pynsted ïa ka jingkiew ha ka ïoh ka kot, thaw ki lad ïoh kam ïoh jam bad kin synñiang ruh shi kat dei sha ka jingthmu jong ka ‘Viksit Bharat’.
Haba kren ha ka jingïalang, u Myntri Rangbah ka Jylla, u Conrad K. Sangma, u la ong ba kane ka thaiñ ka la jam shakhmat na ki bun phew snem jong ka jingbym shong suk shong saiñ, sha ka juk jong ka jingshong suk kaba saphriang bad ka jingskhem ha ka saiñ pyrthei, da kaba pynkynmaw ïa ka jingïohi jngai jong u Myntri Rangbahduh ka ri ba kane ka dei ka por kaba biang eh na ka bynta ka Thaiñ Shatei Lam Mihngi.
Haba pynpaw ïa ka jingkylla sted ha ka ïoh ka kot jong ka Meghalaya, u la kdew ba ka Jylla mynta ka don ha ka kyrdan kaba 3 ha ka ri baroh kawei ha ka jingkiew jong ka GDP ha kine ki 5 snem ba la dep, kaba la pynlong da ka jingkiew ar shah ha ka Mang Tyngka jong ka Jylla, ka jingkiew kaba hynriew shah ha ka jingpynlut pisa, bad ka jingbei tyngka kaba T.50,000 klur ha ki jingtei surok.
Shuh shuh haba ban jur ba kane ka jingkiew sted ha ka roi ka par ka dei ban long lyngba ka jingpyrshang kaba ïatreilang, u la pynkut da kaba ong, “Nga kyrmen ba kane ka jingïalang kan ym long tang ka prokram, hynrei kane kan long ka jingsdang jong ka jingïaid lynti kaba jrong bha bad ka jingïatreilang ka ban pyntikna ba ngin rah lang ïa baroh ar – ki tnad shimet, ka Sorkar, bad khamtam eh, ïa ki paidbah sha ki kyrdan kiba thymmai ha ki sngi ban wan.”
Ha ka jingïalang plie ïa ka NEIINFRA 2026, la don lang ruh u Myntri Rangbah ka Nagaland, u Dr. Neiphiu Rio, Symbud Myntri Rangbah (ka Nagaland), u T.R. Zeliang, ki Symbud Myntri Rangbah ka Meghalaya – Bah Prestone Tynsong bad Bah Sniawbhalang Dhar, ki heh ophisar ka Sorkar Pdeng bad Sorkar Jylla nalor kiwei-kiwei.
