Shillong, Jylliew 15
Ka Khun Hynñiewtrep National Awakening Movement (KHNAM) kala kyntu ïa u Chief Engineer ka State Sports Council (SSC) ban pyntreikam lang ïa ki jingmyntoi jong ka Meghalaya Regular Casual Workers Scheme, 1996 sha ki nongtrei ba siew bainong sngi jong ka Council.
Ha ka dorkhas kaba la aiti ha ka sngi Nyngkong, ka KHNAM kala kdew ïa ka OM jong ka Sorkar Jylla ha 16 tarik u Nailur 1996.
Kane ka skhim ka ai jingithuh ïa ki nongtrei Casual ba shu siew bainong sngi bad ban ithuh noh kum ki Regular Casual Worker (RCW) ïa kito kiba la ïai bteng ban trei pyndep haduh 10 snem ha ka kam. Kala buh ruh ïa ki kyndon ban ïoh shuti bad kiwei-kiwei ki jingïoh jingmyntoi bad ka jingbhah ne Reservation kaba 50% ha ki kam kiba lait hapoh jong ka Group D, ha kaba shiteng jong ka jingshakri ki RCW la kheiñ na ka bynta ban ïoh jingmyntoi ha ka por ba shongthait noh na ka kam.
Ka seng kala kynnoh ba ka State Sports Council kam shym la pyntreikam thikna ïa katei ka scheme.
Katkum ka jingpynpaw ka KHNAM, kala ong ba ki nongtrei kila ïoh ïa ka bai bylla kaba rit bha ban ïa ka dor kaba la buh da ka tnad Labour bad kiwei-kiwei ki kyndon ïoh jingmyntoi hapoh ka EPF bad ESIC ym shim la don satia.
“Ki nongtrei ha ka State Sports Council kila ai ïa ka jingshakri, hynrei kila ïai bteng ban duh ïa ka hok kaba la pynthikna katkum ka Scheme jong u snem 1996. Ka bai bylla ka jong ki ka long kaba duna ban ïa ki kyndon kiba la buh da ka tnad Labour bad kim shym la ïoh ïa ka EPF ne ESIC,” la ong ka KHNAM.
Ka KHNAM kala dawa ïa ki 3 tylli ki jingtuklar ba dei ban pyntreikam ïa ki kyndon jong ka RCW 1996 ïa baroh ki nongtrei bylla hapoh jong ka Council, dei ban pynbeit thymmai ïa ka bai bylla ka ban ïaid katkum ka dor kaba la buh da ka tnad Labour bad dei ban pynrung ïa baroh ki nongtrei ban ïoh ïa ka EPF bad ESIC katkum ka jingpynkup bor jong ka Sorkar.
Ka KHNAM kala bynrap ba ka jingshimkhia u Chief Engineer kan ïada ïa ka hok jong ki nongbylla sngi bad ban pynthikna ba ka rukom treikam kan long katkum ki polisi treikam jong ka Jylla.
