Khliehriat, Jylliew 15
Namar ba don ka jingthmu jong ka Jaiñtia Coal Owners, Miners, Suppliers & Workers Association (JCOMSWA) ban pynlong ïa ka jingïaid paidbah (Rally) na Ladrymbai Dongwah haduh ha ka ophis jong u Deputy Commissioner, East Jaiñtia Hills District, Khliehriat ha ka 16 tarik mynta u bnai, da ki kyndon pyntreikam ban khang ïalum briew.
Kumta ki bor pynïaid district ki kyrpad ïa ki nongïalam jong ka JCOMSWA ban nym tur paidbah sha ophis jong u DC namar la khang ban ïalum paidbah ha katei ka ophis lyngba ka hukum katkum ka kyndon 163 jong ka Bharatiya Nagarik Suraksha Sanhita, (BNSS), 2023.
Ka Sorkar Jylla ka la shimkhia ïa ka lad ban plie ïa ka jingtih dewïong bad ka Sorkar Pdeng bad kane ka kam ka dang ïai bteng haduh mynta ha ryngkat ka jingïatreilang jong ki trai par dewïong, ki nongshalan nongkhaïi bad kiwei kiwei.
Shuh shuh ka ophis u Deputy Commissioner ka kwah ban pynshai halor kato ka khubor ba la saphriang ha ki lad pathai khubor kaba ong “Phah ka ophis DMHO-EJHD da u Doctor Mrad ban eksamin ïa u Bah Marshall ba shah thngan ha Lad Rymbai”.
Halor kane ka ophis ka don ban ong ba ha ka 12 tarik Jylliew, 2026, u Dr. F. E. Langstang, A.H. & Veterinary Officer, Khliehriat u la leit ha katei ka jaka shah thngan kum u “Majistor (Executive Magistrate)” katkum ka order ba la pynmih da u District Magistrate lyngba ka Order No. EJHD/CON.3/L.O/VOL.I/2025/142 Dated 9th June, 2026″.
Shuh Shuh na ka liang u DMHO, Khliehriat u la pynmih ïa ka roster duty jong ki Doktor (Medical & Health Officers) ban leit peit ïa ka koit ka khiah u Bah Marshall Biam lyngba ka shithi No. DM&HO/EJHD/MISC-05/2025-26/3175 Dated Khliehriat the 5/6/2026. Te kumta ka jingkynnoh ba phah da u Doktor Mrad ka long kaba bakla bad lamler.
Shuh shuh na ka liang jong u General Secretary ka JCOMSWA u la kylli na u Additional Deputy Commissioner, Khliehriat ïa katei ka jingwan u Dr. F.E. Langstang bad la pynshai ïa u, ba la phah ïa u Dr, F.E. Langstang kum u Majistor (Executive Magistrate) bad u Medical & Health Officer ruh un sa wan tang dep ka training jong u. Ka ophis jong u Deputy Commissioner, Khliehriat ka ban biang ban pynshai ba u Dr. F.E. Langstang, A.H. & Veterinary Officer, Khliehriat u leit duty kum u Majistor (Executive Magistrate) bad u dei uwei na ki ophisar hapoh District ba la pynkhamti ïa ka bor Executive Magistrate da ka Law Department.
