Shillong, Jylliew 16
U Myntri Rangbah ka Jylla Conrad K Sangma ha ka sngi Ba-ar u la ai khublei ïa ki pulit ka Anti-Narcotics Task Force (ANTF) na ka bynta ka jinglah ka jong ki, ban jop biang ha kawei ka jingïakhun pyrshah ïa u drok, hadien ba ki lai ngut ki nongkhaïi drok ki la shah kem noh ha West Garo Hills District.
Ha ka jingthoh ba la buh ha rynsan X, u Conrad u la ong ba ka jingkhynra ha Tikrikilla ka la lam sha ka jingïoh kurup ïa ki jingdih buaid kiba shongdor kumba T.9 lak.
“Ka jingshah kem noh jong ki lai ngut ki nongkhaïi drok bad ka jingïoh kurup ïa u drok ba shongdor kumba T.9 lak ha Tikrikilla, West Garo Hills District, ka phah ïa ka khubor kaba khlain bad ba shai, ba ïa ki kam be-aiñ yn nym ailad satia,” la thoh u Myntri Rangbah.
Ka ANTF ka la pynjur ïa ka jingkhynra ha kylleng ki bynta jong ka Jylla, kum kawei na ki bynta jong ka Sorkar ban ïakhun pyrshah ïa ka kam khaïi drok.
U Conrad u la ïai kren bad pynpaw ba ka jingïakhun ban tehlakam ïa ka kam khaïi drok ka dei kawei na ki mat ba ka Sorkar ka buh hakhmat, da ka jingïatreilang bad ki pulit bad ki bor syntiat ka Sorkar Pdeng.
