Shillong, Jylliew 16
Ka Synjuk Ki Hima Arliang Wah Umïam-Mawphlang Welfare Society (KSKHAWU-MWS), kaba dei kawei na ki kynhun treimon sngewbha ba paw khmat ha kaba pynneh pynsah bad ïada ïa ka Mei Mariang, ha ka 15 tarik u Jylliew, 2026, ka la rakhe ïa ka jingdap 15 snem jong ka, da kaba pynlong ïa ka jingïalang ha Nongrum Mawphlang.
Ka Synjuk ha ki 15 snem ka la pynsawa kham bun da ka kam bad ka la ïaid shakhmat ruh ban wanrah ki lad ki lynti ban kyntiew ïa ka ïoh ka kot ki nongshong shnong kum ha ki kam jngohkai pyrthei, ki lad ri jingri, ki kam ban kyntiew ïa ka jingnang jingtip, ka koit ka khiah, ki kam rep bad kiwei-kiwei pat.
Shuh-shuh ha kane ka sngi ka Synjuk kan jam sha ka bynta kaba san ha kaba pyntreikam ïa ka REDD+ Project lane ka ‘Reducing Emissions from Deforestation and Forest Degradation’ kata ban ïada ïa ki khlaw ki btap bad ïa ki jingthaw ba im.
Ka Synjuk ha kane ka sngi ka la pynkup burom ïa ki dkhot barim bad ba mynta ha kaba la pynïaid da u Bah Tambor Lyngdoh, Chairman ka Synjuk ha kaba la sam ïa ki jingpynkup burom da ka Kong RM Kurbah, Commissioner and Secretary sha ka Sorkar Meghalaya ba dei peit ïa ka tnad Home (Police), Tourism bad kiwei-kiwei kaba la long kum ka Kongsan, u Bah Lamphrang Blah, President ka Society uba dei u Myntri Hima Mawphlang nalor kiwei-kiwei pat.
Ka Kong RM Kurbah, haba ai jingkren ka la kren halor ki jingïadei ki kam ba ka Society ka trei bad ba kiba la ai mynsiem shibun eh ïa ki nongshong shnong ha ki Hima kiba don ha ka Society. Ka la kren ruh halor ka Mawphlang, kaba don ïa ka bynta ba kongsan bha ha ka kam jngohkai pyrthei ïa kaba ki samla ka thaiñ ki don bha ïa ka lad ban kyntiew ïalade ha kaba bun ki liang.
Haba kren halor kane ka sngi, u Bah Tambor Lyngdoh, u la ong ba ka long ka sienjam kaba sngewkmen bad kaba wan lyngba ka jingïatreilang ha ka Synjuk hi baroh kawei nalor ka jingkyrshan ki Hima, ki bor shnong bad ki nongshong shnong.
Shuh-shuh u la ong ba ka thong hi kumba long ka dei ban pynneh-pynsah bad ai jinghikai halor ka Mei Mariang, hynrei ki bun kiwei pat ki kam kiba ka Synjuk ka la prat lynti bad khmih lynti ruh ba ha ki snem ban wan kan nang leh shibun ki kam ki ban pynmyntoi ha baroh ki liang.
Ïa kane ka jingrakhe dap snem ba 15 jong ka Synjuk la pynshongkun da ka jingïashim bynta lang ki longkmie longkpa da kaba ai ïa ki jingkren bad kiba kdew ïa ki lad ki lynti ba ka Society ka plie lad ha kylleng ki Hima.
